So, Mai hömmer, unn doss woor früher traditionell die Johreszeit, wo gheiert wurrn iss. Zumindest wenn mer nedd „gemüsst“ hodd unn no zum Beispiel n November, Dezember odder goor n Januar heier musst. Lang vorbei. Heier „müss“ dudd mer heutzudooch sowieso nix mer, unn s Heiern an sich hodd sich grundlegend verändert. Ich möchts fast mit n Hausbau vergleich. Früher hömm alle zommgelangt, mer hodd sich geecheseitig gholfe unn woor fast jeden Samsdich irchendwo als Handlanger offn Bau. Wenn’s Haus fertig woor, hömm sich alle gfräät. Heut? Schlüsselfertig, 600.000 Euro. Wie bei die Hochzich: Früher iss offs Geld geguggt wurrn, unn obwohl mer den Festdooch scho früh oogfange hodd (kee „Kaffee-Hochzich), iss durch Freundinne gholfe wurrn, die Verwandschoffd hodd Kuche gebacke, die Tanten hömm gekocht, unn owerts worrn die Leut mit Schnitzel unn Brotwürscht zufriede. Heut? „Hochzeit 2.0 – Die Ehe als Event!“ Die Trauung im Freie („Trauplatz“), Wedding-Planner, Drohnen-Video, Candybar, DJ, Liveband mit Saxophonist, Großfeuerwerk. Die Kirch unn der Pforr? Wenn überhaupt, dann nur noch schmüggends Beiwerk. Ich hoff jo, däss der Trauplatz nedd desweeche so hässd, weil ville so gschlossene Ehen scho noch kurze Zeit widder „blatze“. Woss aa römm iss? Der Brauch, nochmiddooch nooch n Kaffee die Braut zu entführn. Hobb ich jetzt a Interview mit een vo die berühmt-berüchtigte Wedding-Planner gelese, der wörtlich folchendes vo sich geewe hodd: „Brautentführung – für mich der schlimmste Brauch überhaupt! Freunde verschwinden mit der Braut heimlich von der Feier, der Bräutigam muss sie suchen und meist in einer Gaststätte freikaufen. Abgesehen davon, dass dies frauenfeindlich ist, sollte man bedenken: Das Brautpaar plant diesen Tag über Monate oder Jahre im Voraus und hat ganz genaue Vorstellungen davon. Und dann wird man getrennt von seinen Liebsten, um anschließend in irgendeiner „Spelunke“ irgendwelche komischen Trinkspiele zum Freikaufen machen zu müssen.“ Ja. Doo fräächd mer sich widder, wie mir doss früher alle überlebt hömm! Wie zum Beispiel aa die ominöse Spiele, die owerts ömmer gemocht wurrn senn. S bekanntst: Die unverheierte Frauen hömm sich hinner der Braut versammelt unn die hodd ihrn Brautstrauß üüwern Kopf nooch hinne gewurfe. Annahme: Wer den Strauß fängt, heiert als Nächste. Ich woor neulich amoll off a Beerdigung vo n ältere Moo. Hatt a glenns Sträußle debei unn docht so bei mir: Wenn ich jetzt s sellwe mach dääd, wie die Braut beim oowe beschriebene Spiel? Mei Sträußle nehm unn üüwern Kopf noch hinne schmeiß? Unn wer doss Sträußle fängt, …. Nee!!! Hobb ich dann doch nedd gemocht. Mer söll nedd jeden Blödsinn mach, der een eifällt. Servus, der Eustach.