So, gewählt hömmer endlich. Gott sei Dank! Über die Ergebnisse sölle sich annere ausläss. Ich bin froh, däss mich beim Spozierngehn unn Autofohrn jetzt nix mer so vill staatstragend unn huldvoll bliggende Kandidate oogugge unn ömm mei Stimm oflehn. Kommunalwohle senn jo wallich a Riesensach – zumindest woss die Gröss vo die Stimmzettel oobelangt! Der für n Kreisdooch – ich hobb noochgemesse – misst sagenhafte 98 x 68 cm. Doss iss a Fläche vo 0,67 Quadratmeter. Bei 47.000 Wahlberechtigte bei uns im Landkreis ergidd doss ausgebrädd a Fläche vo exakt 31.490 Quadratmeter. Entspricht 63 Bauplätz zu je 500 qm oder 5 Fußballplätz! Ja, so iss doss. Alles würrd statistisch ausgschlochd unn ausgeweerd. Jetzt hobb ich jo wallich nix geeche die Recherei unn Auswertunge, owwer a Meldung vo neulich hodd a miich läss staun. A blöds Dhema, owwer mir müsse uns mit befass. Es gedd ömm doss, woss jeden vo uns jeden Dooch dröggd unn bloochd, unn wie mir jetzt gloor wurrn iss, mechd die Statistik unn die modern Technik aa dovoo nedd halt. Die Überschrift vo besagter Zeitungsmeldung woor „Smarte Unterhose misst die Pups-Frequenz - Wie oft hat der Mensch täglich Blähungen?“ A neue US-Studie hädd angeblich s erscht mo üüwerhaupt genaue Eindrück unn überraschende Zohle geliefert - dank einer „smarten Unterwäsche“. S Würrdle „smart“ stammt (wen wunnerts?) aus dem Englische unn bedeut ächendlich „intelligent“, „clever“ odder „geschickt“. Wenns ömm moderne Technologie gedd, meend „smart“ owwer wörtlich unn genau genomme, däss a Geechestand üwer die folgende drei Kernfähigkeite verfügt: selbstlernend, vernetzt unn reaktionsfähig. Unn doss jetzt im Zusammenhang zu a „smarte“ Önnderhose (ich zitiere): „Ein kleines Gerät, das an einer normalen Unterhose befestigt wird, misst mithilfe eines Sensors präzise die Gasabgänge im Alltag.“ So weit, so gut. S Ergebnis vo die Studie hodd oo 19 Leut gezeigt: Gsonnde Erwachsene produziern im Schnitt 32 Gasabgäng pro Dooch – grob doppelt so vill wie bis jetzt in die Fachliteratur oogenomme. Hädd mer doss gedocht? Alles Statistik – owwer doch bedenklich. 32 Gasabgäng (off gut deutsch „Pfürz“!) jeden Dooch senn 1,33 pro Stonn. Wenn du doo mit 200 Leut drei Stonn lang in a Veranstaltung setzt, iss die Rechnung: 200 Leut x 1,33 = 266 x 3 = 798 Abgäng. Im gschlossene Raum. Prost Mahlzeit! Unn a weitere Statistik in verwandtem Zommehang, die mich aa läss staun hodd: Jeder vo uns verbraucht pro Johr 12 kg Klopapier pro Kopf. Nix geeche die 12 kg. Doss läss ich mer jo noch eigeh. Owwer „pro Kopf“? Versteh ich irchendwie nedd … Servus, der Eustach.