Mer seechd jo ömmer, däss s Laawe mit all den technische Fortschritt, den mir zweifellos hömm, ömmer leichter würrd. Mer muss owwer aa seh, däss vill Zeuch aa schwerrer unn komplizierter wurrn iss. „Big brother is watching you!“, odder wie mir sooch dääde: „Dei grösser Bruder beobacht dich!“ Ständig unn üüwerool. A boor Beispiele. Wenn du früher aus s Haus bist, wo dei gudds alts Festnetz-Telefon (doss groo mit die Wählscheibe, n schwerre Hörer unn a lange Schur) gstanne wor, worscht du furt unn kee Sau kannt gewöss, wo du bist. Keener kannt dich onnderwaachs oogeruf, keener konnt über „Standort teilen“ odder goor „Live-Standort teilen“ gseh, wo du dich römmtreibst unn keener hodd dir Vurwürf gemocht, wenn du nedd noo s Wischkistle bist, wenn er dich zu n x-beliebige Zeitpunkt oogeruft hodd. Schlimm droo senn heut aa die leidgeprüfte LKW-Fohrer. Früher hossd du zu dein Disponente dehemm gsocht, däss a Ströss gsperrt iss odder du weeche a Baustell n Stau hossd, bist nei die Wirtschoffd, unn hossd in aller Ruh gesse unn getrunke. Heut??? Der Disponent sidd üüwer GPS offn Meter genau, wo du bist, unn schecht dich quer durch Deutschland unn halb Europa. Nächsts Beispiel: der Fußball. S würrd penibelst ausgewert, wie viel Kilometer du in a Spiel gelaffe bist, wie viel Zweikämpf du verluurn odder wie viel Fehlpäss du gspielt hossd unn in die Auswertung über dich iss zu lese: „Der Spieler hat in der ersten Halbzeit sechsmal die Frisur gerichtet unn zwischen der 60. und der 70. Minute durch Meckern 250 Kalorien verbraucht. Mehr als beim Warmmachen vor dem Spiel!“ Mer fräächd sich im Nochhinein, wie früher monches funktioniert hodd. Wenn heut a Stammtisch mit n Bus zum Oktoberfest odder a Fanklub zum Fußball nooch München föhrt, unn jemand verpasst hemmwärts n Bus, ruft er mit sei Smartphone im Bus oo, lässd sich mits Taxi noochfohr unn iss ab n nächste Parkplatz widder dabei. Früher? Keine Chance!!! Wenn du doo n Bus in München verpasst hossd, worsch römm. Im Bus niemand erreichbar, du sellwer aa nedd unn die enzich Möglichkeit fürrn Reiseleiter woor, oo a Raststätte vo a Telefonzelle aus dehemm bei die Mutter oozuruffe, öm auszurichte, däss der Klaus n Dooch später hemm künnt wie der Bus. Ja, in Zeiten, wo der Kühlschrank intelligenter iss, wie der, der ihn auffölld unn sich draus bedient, kee Wunner. Unn ganz schlimm: a moderner Kühlschrank meld‘ dei Krankekass automatisch, wie oft du Bier statt Bio-Joghurt neigstellt hossd. Schwere Zeiten!!! Servus, der Eustach.