Ihr hobbt doss neulich vielleicht aa geleese. Wenn sich jemand bei a Firma bewirbt, entscheid nedd ömmer die Leistung, die aus die Unterlagen, Zeugnisse unn Bescheinigunge zu entnehme iss, sondern der Noome. Die Uni Siegen hodd n Versuch gemocht unn Bewerbunge onnder verschiedene Noome oo Firmen gscheggt. Unn dann ausgewert, wieviel Eiloodunge die fiktive Bewerber gricht hömm. 50.000 Bewerbunge worrn verscheggt worrn unn s enzich, woss verschieden woor, woor der Noome. S Ergebnis: bei 100 Bewerbunge hodd a „Lukas Becker“ 67, a „Ivan Smirnov“ 56, a „Ariel Rubinstein“ 54, a „Yusuf Kaya“ 52 unn a „Habiba Mahmoud“ ner bloß 36 Eiloodunge gricht. Bezeichnend. Ja, in der Wissenschaft guggt mer genau hie, ob a Noome üüwer Erfolg odder Misserfolg entscheid. Owwer s iss jo aa nedd eefoch, weil du konnst dich jo nedd degeeche gewehr, du hässd halt wie du hässd! Wobei: bei die Noochnoome läss ich merr doss jo noch eigeh, die senn meistens scho uralt unn keener wääs so richtig, wo se herkomme. Wenn dann a Elegdrigger „Kurzschluss“, a Dünchner „Schmierfink“ odder a Zimmermoo „Windschief“ hässd, bist du machtlos. Doo gilt ehrer der Spruch „Vorsicht bei der Berufswahl“. Bei die Vuurnoome siehts scho a weng annersch aus. Doo stenn die Eltern in der Verantwortung. Früher, wie die Mutter noch im Krankehaus looch, unn der Vodder stolz nei’s Standesamt marschiert iss, ömm s Töchterle odder s Büüwle in’s Stammbuch eiläss zu drooche (odder eidrooch zu lässe???), senn zwösche Vodder unn Mudder unoogsbroche richtige „Hömmer“ bassierd! Der Vodder hodd sein Wunsch-Noome durchgsetzt, s Kind musst sei lebelang dronner leid! Heut? Undenkboor! Stellt euch vüür, ausn „Finn-Alexander“ wäred a „Heinz-Rüdiger“, aus a „Luna“ a „Elfriede“ odder ausn „Ben“ a „Detlef“. Doo hömm die Standesbeamte a Riesen-Verantwurrdung, ömm eizuschreite, unn nedd jeden noch so veröggde Noomewunsch zuzulässe. Vielleicht scho bekannt, owwer ömmer widder schöö, die Gschicht, wie a stolzer Vodder nei s Standesamt marschiert iss, unn sein neugeborene Sohn „Tulpenheini“ däff läss wollt. „Unmöglich!!!“, hodd der Standesbeamte heftig unn konsequent interveniert, „Tulpenheini“ ist unmöglich! Überlegen Sie doch einmal, was Sie Ihrem Sohn mit diesem ungewöhnlichen Vornamen sein Leben lang antun würden!“ „Woss hässd doo antun würrden?“, hodd der Vodder durchaus logisch argumentiert unn gekontert: „Unner Tochter hässd Rosemarie, unn doo hobbt ihr domols nix gsocht!!!“ Servus, der Eustach.