S gidd Männer, doo senn alle Geräte, Maschine unn Fohrzeuge ömmer dibbdobb in Ordnung unnn gepflegt. Alle Säägbleeder senn gschärft, die Fohrräder senn ömmer sauber unn gebutzt, die Keede würrd regelmäßg vermesse unn notfalls ersetzt. S Auto iss sauber, bei’n Roosemäher iss s Messer ömmer gschärft, der Ölwechsel iss regelmäßig gemochd, in die Werkstodd herrscht penible Ordnung unn a süsst wösse sich solche Männer handwerklich ömmer gut zu hölfe. Unn dann gidds Männer wie miich. Bei’s Fohrrod langts, wenn die Räder römm genn, der Roosemäher würrd n Herwest nooch s letzt Mähe nei die Hütte gstellt unn genau so n Frühjohr widder rausgholt. Bei’n TÜV hofft mer, eefoch so durchzukomme unn aa süsst gilt: mööglichst wenig Aufwand unn drauf oolässkomm. Wie ich neulich mit mei glee Hängerle, Baujohr 1995, bei’n TÜV woor unn nix schlechts gedocht hoo, hodd der jung Prüfer naach Jahren erstmools die Plakette verweigert. „Worömm?“ hobb ich schüchtern gfräächd. „Weil die Reifen älter sind als ich!“ Rumms! Ich geb zu, däss ich handwerklich a Blinder bin. Zum Beispiel a Motorsaache oozumache, iss für mich a Herausforderung. Wie ömmer guggt merr sich a YouTube-Video oo unn stellt fest, däss doo ömmer alles wunderboor klappt. Dann raus zur Praxis – unn nix funktioniert wie bei die Herrn Spezialiste! Aa die analoge. „Joke nei, gezerrt, unn wenn die Saache maunzert, Joke raus, widder gezerrrt, unn oo isse!“ Nedd bei mir. Ich hobb’s scho fertig gebrochd, mit mei Saache nei’s Durrf zu laffe, sie mir vo n Spezialiste oomach zu lässe – unn mit laufender Saache unn Standgas widder hemmzulaffe. Worömm ich doss grood heut alles schreib? Weil genau jetzt die Johreszeit iss, wo mersch in die brall Sonn kaum aushält unn desweeche jeder n Schodde sücht. Wenn der scho doo iss, gut. Owwer: stellt euch n belebte Platz mit vill Leut vuur, s iss Vuurmiddoch unn im Außebereich vo a Wirrdschoffd odder a Café senn alle Sonneschirm noch zu. Die Sonn scheint scho heggehooch, s würrd worm, du süchst mit dei Fraa n Platz unn sie fordert unmissverständlich: „Mach amoll den Sonneschirm auf!“ Iich? Als handwerklicher Blinder??? Dehemm off die Terasse vielleicht scho, owwer doo? Vuur alle Leut??? Nei s Durf laff, mir den Schirm auflässmach unn dann mit n offene Schirm widder zu die Wirtschoffd laff, scheid‘ leider aus … „Zwickmühl“ nennt mer sowoss. Servus, der Eustach.