Fredis Glosse
Sondervermögen unn flexible Liquiditätsreserve (Mundart) | 25.03.2025 |
Ich schreib‘ jo selten üüwer Bolidigg, owwer heut‘ muss es amoll sei. Es geht ömm all die Wolhldaade, die uns die höchstwahrscheinlich neu Regierung zukomm läss will. Zunächst wunner ich mich, däss doss vill Geld, doss mer sich burch will, „Sondervermögen“ genannt würrd. Die, die sich üüwer den Begriff „Bürgergeld“ mokiern, nenne neue Schulde also „Sondervermögen“. „Sonderschulden“ wär‘ zutreffender. Owwer gut, monche Nicht-Boliddiger nennes aa „flexible Investitionsreserve“, wenn se ihr Konto üüwerziehn. Woos söll mit dem ville Geld, neewe Rüstung unn Investitione in Infrastruktur, alles bassier? Aa Wahlgschenke besurcht wär. Die Bendlerbauschale söll erhöht weer, der Agrardiesel widder billiger weer, die Mehrwertsteuer in die Gastronomie gsenkt unn die Mütterrente erhöht weer. Dozu später widder. Erscht noch amoll zu die Rüstungsausgaawe. Derzeit breite Zustimmung, owwer ächendlich jo ein Wahnsinn, woss mir, die ganz Welt, doo mache! Mir leewe im 21. Johrhunnert, verhalte uns owwer wie seit 2.000 Johr! Mir hömm künstliche Intelligenz, smarte Kühlschränk, die automatisch unner Esse bestelle unn Quantencomputer, brauche owwer ömmer noch echte, orme Mensche, die mit Gewehre in die Hand in Wälder römmrenn unn sich geecheseitig bekämpf müsse! Läffd doch eh scho alles mit Drohne, die sicher ausm Hinterland gsteuert werrn. Doss iss grood so, wie wenn mer scho lauter vollautonome Elektroauto hätte – unn dann trotzdem noch een vo die frühere Schupos mit a Fahne hie stelle, der n Verkehr regelt! Genug gejommert, zurück zu die Wahlgschenke, die jetzt ball großzügig verdääld weer sölle. Als findiger unn raffinierter Rhön-Grabfelder hobb ich üüwerleecht, woss jemand mach müsset, ömm vo all dem maximal zu broffidiern: Wenn er nedd scho Bauer iss, n Bauernhof mit Bulldog käff odder wenigstens n Hünnerstool aufstell - fürn Agrardiesel! Dezu n Job in Würzburg oonehm - für die Pendlerpauschale! Dann dreimoll n Dooch in die Wirtschoffd ess unn trink – weeche die gsenkt Mehrwertsteuer. Unn schließlich für die Mütterrente a mööchlichst alte Mutter hobb. Im Noochhinein nedd zu ändern, owwer Glück muss mer halt aa a weng hoo! Unn noch n Vorteil hädds, wenn mer dann n Bulldog hädd: mer konn, wenn die Ströss mit Auto verstellt iss, domit während a Fußballspiel quer üüwern Sportplatz gfohr!!! Servus, der Eustach. |
|
<< zurück |