Ihr kennt sicher alle doss Gfühl, wenn merr in irchend a blöde, unglaubliche Situation iss unn denkt: „Wo isse, die versteggeld Kamera?“ Merr konn eefoch nedd geglääb, woss een grood widerfööhrt unn denkt, merr iss bei „Verstehen Sie Spaß?“. Iss mir neulich soo gange, wie ich off mei Händy a neue Äpp vo mei Krankekass installier wollt. Logisch unn gut, däss bei a Krankekass hohe Sicherheitsstandards gelde, owwer doo hömm se doch a weng übertriewe. Ich musst mich registrier, per Post PIN unn PUK ooforder, bevuur ich dann mei Krankenkasse-Körrdle scänn sollt. Mit mei Händy. Also: Körrdle off n Diisch gelegt, die Händykamera drauf ghalte unn browiert, zu scänne. Iss ömms Verregge nedd gange unn der Vorgang iss ständig erfolglos oogebroche wurrn. Dann hobb ich gelese: „Entfernen Sie zum Scannen die Handyhülle.“ Ich wollt gscheit sei, unn docht: so lang die Kameralinse off die Rückseite frei iss, müssts doch trotzdem geh! Isses owwer nedd. Dann hodd mir a freundliche Hotline-Dame erklärt, däss s Scänne vo mei Körrdle nedd üüwer die Kamera funktioniert, sondern üüwer n Sensor im Innerste vo mei Händy. Also: Hülle roo, gscännt – ging!!! Halleluja!!! Dann koom der Moment, wo ich mich bei der „Versteckten Kamera“ gewähnt hobb: „Wippen Sie Ihr Smartphone hin und her. Anhand Ihrer Bewegungen wird ein besonders sicherer Schlüssel angelegt.“ No gut. Ich hobb mei Gerät hie unn her gewippt, während a Fortschrittsbalke gezeigt hodd, wie lang ich noch wipp muss. Unn jedesmoll, bevuur ich kurz vuur a Sehnenscheidenentzündung woor, iss der Vorgang oogebroche wurrn unn ich musst mits Wippe vo vurrn oofang. Viermoll, fönnefmoll, sechsmoll. Irchendwenn hobb ich mich scho zu die Hotline-Dame sooche ghört: „Owwer gemerk konn ich mir die ganze Wippbewegunge fei nedd. Unn ob ichs noch amoll genau soo hiebreng, wääs ich aa nedd!!!“ Irchendwenn hodds geklappt unn die orm Seel hatt‘ ihr Ruh. Gott sei Dank! Es iss nix merr aufzuhallde, owwer für mich senn s Internedd unn Händys die Wurzel vo vill Brobleeme, die mir allerweil hömm. Drömm zum Schluss noch a Witz zum Veräbbeln vo die (un)soziale Medien. Internet: „Ohne mich seid ihr nichts!“ Wikipedia: „Ich weiß alles!“ Google: „Ich hab‘ alles!“ Facebook: „Ich kenn‘ alle!“ Instagram: „Ich hab‘ alle eure Fotos!“ Elektrizität: „Redet nur weiter...“ Super-Konter!!! Servus, der Eustach.