Ich stell aus aktuellem Anlass jetzt amoll a goor nedd so gewagte Dhese auf: wenn du heut‘ mit n Hubschrauber medde im riesige Salzforst ausgesetzt wärest unn dann die Aufgab grichst, ohne Hilfsmittel wie a Handy odder a Landkorrde nauf zum Kreuzberg zu finne, schafft du des leichter, wie zurzeit midds Auto von Neuscht nooch Könshoofe zu fohrrn! Iss doch wohr, odder? So viel Baustelle, Straßensperrunge, Umleitunge odder Ampel wie derzeit hobb ich mei laawelang noch nedd erlabbt! Egal, ob du nauf- odder roowärts föhrscht, du musst genau überleech, wie du wo gfohr konnst. Mei normale Route von Neuscht nooch Könshoofe: Neuscht - BayWa-Kreuzung - Autobahnzubringer - Wülferschause - Sool - Grösseneuscht - KÖN. Derzeit: ein Ding der Unmöglichkeit! Und des seit Wochen! Über die BayWa-Kreuzung komm ich zwoor reiwärts, owwer nedd naus. Wenn ich langsame LKW oon Berg bei Herschfeld zur Autobooh vermeid unn über Hollscht fohr well? Gedd aa nedd. Brücke bei Hööscht jetzt scho seit Monaten gsperrt. Oo die Autoboh komm ich dann zwoor Richtung KÖN, owwer nix mer zurück. Ihr wisst jo: Böschungsrutsch am 18. Februar, Totalsperrung. Dann halbseitig in ee Richtung widder auf, Sanierung. Kurz vor Fertigstellung am 1. Oktober erneuter Abrutsch oo die gleich‘ Stell. Alles vo vurrn, Sperrung in Richtung NES mindestens bis Dezember. Und jetzt seit gut a Woche in Sool: „Sanierung der gesamten Ortsdurchfahrt in 6 Bauabschnitten bis Dezember 2024.“ Ampel, Stau, Chaos. In alle zwee Richtunge. Gut, hobb ich neulich gedocht. Fohr ich halt widder amoll über Löhrieth, Bildhause unn Grösseborderf nooch KÖN. Pfeuffedeggel! In Borderf würrd a neuer Kreisverkehr gebaut. Monatelange Sperrung. Umleitung über Kleeneuscht. Nedd nur ich wünsch mir in Zeiten wie diesen desweeche nochts im Traum ömmer widder, däss die legendär‘ Vision vo unner Doro Bär (gidds die noch?) mit ihr Flug-Taxis endlich in Erfüllung gehen möge. Flug-Taxi: doss wärsch! Start‘ senkrecht wie a Drohne unn rauscht dann mit 300 km/h durch die Luft! Hässd: du hossd n zwöllef Uhr Hunger off a Könshöfer Broodwurscht, steigst in Neuscht ZOB nei a Flug-Taxi, bist in knapp 4 Minudde in KÖN offn Morrdblatz. Isst dei Wurscht, steigst widder nei’s Flug-Taxi – unn bist n viertelW ees scho widder in Neuscht. Eefoch zu schöö, ömm wohr zu senn! Servus, der Eustach.