Doss iss aa jedes Johr s selbe: kaum iss die Schul widder losgange, städd aa scho widder s Oktoberfest in München vuur die Tür. N vergangene Samsdich iss s erscht Bierfooß oogstoche wurrn. Wie ömmer live im Fernsehen zu verfolche! Owwer zuerscht zurück zur Schul. Schönne Gschichte spiele sich doo oo. Unn die Schulkinner senn raffiniert wurrn. Fräächd die Lehrerin a Määdle: „Was habt ihr denn in den Ferien gemacht?“ Doodrauf die Schülerin: „Nicht viel. Es reicht keinesfalls für einen Aufsatz.“ Ja, ja, die junge Leut. Bloß nix schaff! Unn jetzt gidds aa noch a Petition geeche „unangekündigte Schultests“, in Kurzform „Ex“ genannt. Begründung: „Stress, Panik und hoher psychologischer Druck“. Tja, soweit senn mer! Der Schulbeginn würrd aa ömmer durch die Medien begleit‘. Im Radio hobb ich ghört, wie a Moderator gsocht hodd: „Sicher haben auch Sie in diesen Tagen kleine Menschen gesehen, die einen großen Ranzen auf dem Rücken getragen haben.“ Doo hobb ich kurz überlegt unn bei mir gedocht: Nee, so glee worrn die Mensche, die ich gsenn hobb, goor nedd, unn ihrn grösse Ranzen hömmse aa nedd hinne offn Buggel, sondern vurrn oon Bauch gedrooche …….. Zurügg zu Deutschlands größtem Massenbesäufnis, dem Oktoberfest. S mittlere Festwochenend nennt sich „Italiener-Wochenend“, weil doo eine Völkerwanderung vo südlich der Alpen off die anner Seite eisetzt, unn Italiener in Heerscharen nooch München pilgern, ömm sich die Kante zu gebe. Wobei sie, die Italiener, eh a komisch Volk senn. Als „Blinder“ unn „Kulturbanause“ gilt in deren Augen, wer n Cappuccino aa noch nooch 12 Uhr bestellt unn der, der zu Spaghetti n Löffel bestellt. Doo frääch ich mich: worömm denn nedd??? Unn dann s Lieblingsgetränk der Italiener: der Espresso. Umwelttechnisch iss eener, der a Mooß Bier offm Oktoberfest trinkt, so n Espresso-Trinker haushoch überleeche! Bestellt eener a Mooß Bier, trinkts leer und gidd n Krug zurück, muss bloß der Krug gspült wer unn doo woor immerhin a Liter Flüssigkeit dinn. Bei’n Espresso künnt: a Untertasse, a klitzegless Dässle, a Löffele, a Zucker unn a Produktmenge vo 25 Milliliter. Doss senn lächerliche 2,5 Prozent vo a Mooß Bier. Unn doofür muss die Onderdasse, s Dässle unn s Löffele gspült weer. Nachhaltig iss doss nedd grood. Doo lieber a Mooß Bier gsoffe unn domit die Umwelt gschützt. Prost!!! Servus, der Eustach.