Däss die Welt allerweil jede Menge richtig grösse Brobleeme hodd, döfft jo außer Zweifel steh. Pandemie, Krieg, Inflation, Klimakatastrophen, Flüchtlingskrisen, und und und. Trotzdem find ich’s ömmer widder seltsam unn irchendwie komisch, däss mir uns alle wie mer senn, nedd grood üüwer die grösse Krisen, sondern ährer über die glenne Missgschicke aufreeche. Wenn a Eheboor vuur n Fernseh setzt, Noochrichte guggt und gemeldt würrd, däss irchendwo off der Welt widder a Krankehaus bombardiert wurrn iss, bleibe alle zwee ruhig unn lässe die Noochricht stillschweigend üüwer sich ergeh. Gedd die Fraa kurz nei die Köche, unn er lässt ins Wohnzimmer n laute Schrää los unn flucht, fräächd sie aus die Köche raus, ob scho widder a Erdbeben odder a Sturzflut gemeldt‘ wurrn iss. „Naa! Mei Bierflöschle hobb ich ömgschmesse! Dunnererkeil noch amool!!!“ Owwer woos iss denn a ömmgfalles Bier geeche n Terroranschlag, a Schlammlawine off a Durf odder n Bombenangriff im Gaza-Streifen? A Dreeg!!! Trotzdem mei Red: so richtig aufreech dunn mir uns üüwer Lapalien. Römmgedreht frääd mer sich nedd selten üüwer Zeuch, vo dem mersch ächendlich nedd vermut dääd. Gerüch zum Beispiel. Mei drei Favoriten: wenn a Bauer a Feld ackert, mer mit Fohrrod vorbei föhrt, unn den frische Boode riecht. Der Dampf, wenn mer beim Grille Bier off die hässe Brotwürscht schütt. Odder der Malzgeruch, wenn in die Näh Bier gebräut würrd! Bei die zwee nächste Dinger, über die ich mich ömmer widder frää, werd ihr sooche, der iss doch nedd ganz sauber! Mir egal! Ich frää mich zum Beispiel, wenn a Roll Klopapier zu End gädd unn sich beim letzte Bleedle aa s letzt Fitzele Babier so richtig schöö unn komplett voss Rölle löst. Echt!!! Odder wenn ich a gekochts Ähr schäl unn nooch dem berühmte Klopfer, däss sich’s off die ee Seite zerdröggd, sich die Schoole gleich vo Oofang oo in möglichst grösse Stögge schöö löst unn nedd ständig wertvolle Dääle voss Ähr mit roo gehen. Der Höhepunkt und Gipfel der Freude dann ganz am End, wenn ich onnde ookomme bin, unn sich s önnder Häuble vo die Schoole beim Oblööse komplett unn ohne jede Spur vo Ähr löst. Unn doss so vollkommen bleid, im Licht weiß glänzt unn keinerlei „Schälverletzunge“ aufweist! Ich wääs, ich bin nedd ganz sauber, owwer doss iss mir wurscht! Ich frää mich trotzdem weiter üüwer so Zeuch! Servus, der Eustach.