Sölls wallich scho widder gut ocht Woche her sei, däss mir in Brasilien Fußball-Weltmeister wurrn senn? Verröggd, wie die Zeit vergädd! N vergangene Middwoch, wies widder geeche die Argentinier gange iss, senn alle Gfühle widder hoch komme. Mir senn Weltmeister! Ja, mir! Mir alle, wie Deutschlands bildende Zeitung domols im glorreiche Juli gschriewe hodd. Wallich alle? Also aach Löbbicher, Ottelmannshäuser ooder Niggerschfeller? Unn Raffelshöfer odder die vo die Schworz Pfötsche? Hadde alle noch nie a Fußball-Mannschaft, owwer senn jetzt aach Weltmeister? Woss der Fußball doch alles möglich mecht! Noch kurz vuur die WM bin ich jo offn Tod erschrogge, wie ich in die Zeitung die Überschrift "Bundestrainer Löw stellt seinen 23-köpfigen Kader vor" gelassd hobb. Der iss jo gut, docht ich! Jetzt, wo die WM los gedd, führt er, der Herr Bundestrainer, sei Missgeburt vo Kootzer vuur. Wor owwer dann jo zum Glück doch ganz annersch gemeent. Und dann gings endlich los. Die Sensation für mich: s Freistoß-Spray. Mei erscht Vermutung: doss muss a Deutscher erfonne hobb. Mir, die uns zum Rauche offn Bahnsteig in gaal gekennzeichnete Flächen stelle, nochts um hallwer drei ohne jeden Verkehr drei Minudde lang vuur a roode Ampel stenn bleiwe und beis Schild "Bitte den Rasen nicht betreten" keinen Fuß off selbigen sezt dääde. A annerer als a Deutscher konn doss Freistoß-Spray goornedd erfonne hobb. Weit gfehlt. A Argentinier woorsch! Und jetzt, woos aach in Deutschland in die Bundesliga eigführt weer söll, komme dübbisch deutsche Frooche unn Bedenke: "Woss mache merr denn n Winter, wenn Schnee offn Platz licht? Do sidd mersch jo nedd!" Jeden Schiedsrichter a Äämerle Ruß hinne noo bind? Und jeder Schiedsrichter söll jetzt angeblich erscht amoll n Lehrgang mitmach. Für Freistoß-Spray! Wohrscheinlich ee Woche lang in a Sportschul mit abschließender Prüfung unn bei Erfolg mit a notariell beglaubigts Zertifikat! Armes Deutschland! Bei solche Pfürrz hodd unner Philipp Lahm scho racht, wenn er wie der lang Mertesacker unn der alt Klose in die National-Elf aufhört. Merr konns ihm, n Philipp, wallich nedd verdenk. Wenn die Büüwlich vo die Einlaufkinner regelmäßig grösser senn wie du als Weltmeister. Do konnsde mit die Zeit scho Komplexe gegriech, odder nedd? Servus, der Eustach.