Die Überschrift hobb ich in Anlehnung oo den bekannte Roman unn Film „Der letzte Mohikaner“ gewählt. Ich sooch nur Lederstrumpf, Hellmut Lange, Chingachgook, Uncas, Alice und Cora, Delawaren unn Huronen. Ömmer wenn irgendwo vo „Der/die/das letzte …..….“ die Red iss, würd merr zwangsläufig wehmütig. Wenn die letzt Kuh ausn Stohl getriebe würrd, flennt selbst der hörrdst unn knorrigst Bauer, wenn s letzt Kind ausm Haus auszieht, verdrögge die Eltern a Träne, wenn die letzt Wirrdschoft in a Durf für ömmer zuschließt, leecht sich a Schleier vo Traurigkeit über‘s Durrf, unn wenn irgendwenn in naher odder ferner Zukunft die letzt Bräuerei im Landkreis zumecht, senn die Biertrinker traurig. Es iss eefoch so: allem, woss joohrelang doo woor unn dann weg iss, würrd noochgetrauert, allem woss neu iss unn mer nedd kennt, erscht amoll misstrauisch beäugt. Wehmut würrd nedd ömsuust als „verhaltene Trauer und stiller Schmerz bei der Erinnerung an etwas Vergangenes oder Verlorenes“ definiert. Monches, woss verschwind‘, würrd lang vorher groß oogekündigt unn s würrd aa ausführlich drüü bericht, bei annerem erföhrt merr erscht Wochen später, däss es weg iss. Ich bin neulich wehmütig wurrn, wie ich ghört hobb, däss der letzt‘ Bernhardiner am Kloster Kreuzberg, der „Joseph“, n 28. Dezember letzten Jahres eigange iss – unn nedd ersetzt weer söll. S würrd am Kloster Kreuzberg nach Jahrhunderten also keen Bernhardiner merr geewe. Wehmut, Trauer, Erinnerunge. Irgendwie owwer aa verständlich in Zeiten wie diesen. Lawine am Kreuzberg werrn im Klimawandel zunehmend seltener unn die Leut, die in n Schneesturm versinke unn wie früher in der Rhön sehnsüchtig off n grösse Honnd mit a Fässle mit Schnaps ömm sein Haals worrde, werrn in Zeiten vo Smartphone unn Standortteilung aa ömmer seltener. Unn monche Zeitgenosse dääde nedd amol trink, wenn der Honnd mit sein Schnaps doo wär. Unn s Klössder konn sich eefoch keen Honnd mer geleist. Den Honnd vielleicht scho, owwer nedd die Betreuung. Fachkräftemangel! Der unvergesse Ludwig Klebl, der die Hönnd am Kreuzberg zuletzt liebevoll versurchd hodd, iss gsturrwe, die verbliebene Patres unn Brüder senn zu alt, unn n weltliche Mitbürger nur für n Honnd eizustelle, iss nedd zu finanziern. Hömm mer halt widder a schönne Tradition verlurrn unn senn wehmütig. Droochd‘s mit Fassung! Servus, der Eustach.