Ihr hobbts neulich sicher aa geleese: Deutschand soll 20.000 Elefande aus Afrika griech! Grund iss a diplomatische Verstimmung zwösche Deutschland unn Botswana. Hintergrund: die Grüne welle deutsche Jäger die Einfuhr vo Trophäen vo die Elefandejochd verbiet unn domit dääd Botswana der Elefandeblooch, die’s dürrt gidd, überhaupt nix mer Herr weer. Der Bräsident, a gewisser Mokgweetsi Masisi, hodd jetzt die Faxen dick‘ unn well 20.000 vo sei welle Elefande nooch Deutschland schegg. Sie sölle doo bei uns owwer nedd eigperrt weer döff, sondern frei unn ungezwungen römmlaff. Also, dann macht euch scho mo of woss gfassd! Die erscht Herausforderung, die sich stellt, iss die, wie die 20.000 Elefande in Deutschland verdääld werrn. Ächendlich kee Frooch: natürlich flächenmäßig. Wer groß iss, gricht vill, wer glee iss, wenig. S mit Abstand flächenmäßig grösst Bundesland iss – wer süsst – Bayern! 70.542 qkm vo 357.588 in ganz Deutschland. Nooch Adam Riese gricht Bayern domit genau 3.945 vo die insgsamt 20.000 Elefande. S Saarland, grood amol zweeehalb mo so groß wie Rhön-Grabfeld, muss sich mit lommberde 143 Trampeltiere begnüg. Wie geht’s dann in Bayern mit die 3.945 Bröggel weiter? Verteilung widder nooch Fläche, dessmo je Regierungsbezirk. Oberbayern gricht 1.000, Niederbayern 574, Schwaben 555, die Oberpfalz (doo werrn sich die Elefande allee scho mit die Sprooch schwer dunn) 539, mir in Unterfranken 474, Mittelfranken 402 unn Oberfranken 401. Unn jetzt würrds intressant. Die 474 Elefande, die Unterfranken gricht, werrn nooch Landkreisfläche aufgedääld unn doss hässd, däss Rhön-Grabfeld genau 57 vo die 20.000 in ganz Deutschland gricht. Wenn sich diese 57 Dickhäuter nedd zu sehr verlaffe, hässd doss, däss du bei a Autofohrt vo Sulzdorf/Lederhecke bis Oberweißenbrunn ungfähr alle fönnef Kilometer n Elefande treffsd. Zum Schluss noch a schönner (alter) Elefandewitz: A Elefand zerbröselt beis Vorbeilaffe n Ameisenhaufe bei Bastheim. Die Besengau-Ameise schwörn Rache und stelle a Armee vo 10.000 Ameise auf. Die stürze sich off den Elefande und wellen off n Bode schmeiß. Der Riese schüttelt sich owwer nur kurz unn 9.999 Ameise falle widder roo. Ee Ameise guggt nauf unn sidd: „Der Emil iss noch oowe!!!“. Doo schreie alle Ameise im Chor: „Würg ihn, Emil! Würg ihn!“ Servus, der Eustach.