Neulich hobb ich n Spruch ghört, der mich als n aa scho a weng ältere Zeitgenosse so richtig gfrääd hodd: „Für mich sind die Alten nicht altes Eisen, sondern Edelstahl.“ Wow! Doss gädd in Zeiten vo Jugendwahn landauf landab roo wie Öl! S iss owwer aa so. In die Fußball-Bundesliga muss a Schiedsrichter aufhör, wenn er älter wie 47 iss – egal wie gut er pfeuft. Ins Berufsleben gilt mer als alt, wenn mer 50 iss, unn wenns ömm Neueinstellunge gedd, werrn ehrer Leut so öm die 30, 40 gsücht. Unn monichmoll hömm die Junge jo aa richtig gute Ideen! Bei die Konstruktion vo Bierzeltgarniture zum Beispiel. Iss mir neulich aufgfalle. Johrzehnte lang hömm sich Generationen oo Bierzeltgänger geärgert, wenn se oon Tiisch auße müss setz hömm. Ständig hatt‘ mer doss saublöd Eisegstell zwösche die Bee unn hodd sich die Knie oogschlooche, weil doss Ding rechtwinklig unn genau doo woor, wo mersch überhaupt nedd gebrauch kannt‘. Jetzt gidds neue Bänk mit geboochene Bee unn die biete wunderboor Platz für unner untere Extremitäte! Doo muss jo aa erscht amoll eener drauf komm! Kompliment! Die Alte worrn scheins doch nedd soo gscheit, wie mersche ömmer hält! Oft hauts mit die Jugend owwer a nedd hie. Im Fußball zum Beispiel. Bein glorreiche FC Bayern hodd mer die Junge Salihamidži? und Kahn gejoocht unn die Alte Hoeneß unn Rummenigge senn zurückkomme. Genauso bei die Nationalmannschofft: der Bierhoff iss weg, der alt und einzig Rudi Völler komme. Und trotzdem klappt‘s mit unner junge Fußballer nedd. „Die Mannschaft“ hodd sich zu weit vo die Fans entfernt unn gilt als eitel, unnahboor unn ooghoowe. Hodd jetzt aa der Niclas Füllkrug, (Noch-) Torjäger vo Werder Bremen, festgstellt. Er, der Füllkrug, hodd gsocht: „Wer sind von früher die beliebtesten Fußballprofis? Wenn wir mal an Mario Basler denken, der in Bremen gefeiert wurde wie sonst was - der hat auch nicht wie ein Vollprofi gelebt. Das ist zum Anfassen, wenn jemand kritisch ist, über die Stränge schlägt oder mal nicht perfekt ist.“ Jawoll! Doss iss die Lösung! Weg mit die Fußball-Roboter wie Kimmich & Co. unn her mit Typen wie früher Effenberg, Breitner, Kruse odder Sammer! Unn a guter Fußballtrainer könnt zu sei Spieler genau doss gsooch, woss bei uns amol a Vereinsvorstand am End vo sei Red bein Festkommers ausgeruffe hodd: „Fresst und sauft, ihr Dackel!“ Servus, der Eustach.