In Dänemark iss bemerkenswerts bassierd. Mer hodd n kirchliche Feierdooch („Store bededag“ = „Großer Gebetstag“) oogschaffd, ömm Geld für die Verteidigungsausgaben zu scheffeln. Rumms! Mir hömm in Deutschland sowos Ähnlichs aa scho gemocht, hadde dobei ower hehre Ziele: 1995 iss der „Buß- und Bettag“ oogschaffd wurrn, ömm domit Geld für die Pflegeversicherung freizuschaufeln. Zunächst als Fakt: in Deutschland brengt a Feierdooch volkswirtschaftlich angeblich ungfähr 3,5 Milliarden Euro. Also mache mer mit die Abschaffung doch weiter unn spinne doss furrd, bis alle Feierdeech wagg senn. Dreikönig würrd für die Integration geopfert. Worrn jo schließlich drei Weise aus dem Morgenland und do biet sich doss oo. Im weitere Jahresverlauf würrd‘s schwer. Korfreidich unn Östermonndich. Gleich zwee hinnerenanner. Kossd uns schließlich a lang’s Wochenend! Die Einnohme aus Koorfreidich (strenger Fast- und Abstinezdooch) für gsündere Ernährung („Veggie Day“) unn Össdermonndich für Bio-Eier unn mehr Platz für die Hünner, weil die uns schließlich die Äär für die Nessder brenge! Christi unn Mariä Himmelfahrt würrd ich bei’s Obschaffe zommfass unn doss Geld (immerhin 7 Mrd. Euro!) in die Raumfahrt stegg. Unn weil Mariä Himmelfahrt nur a katholischer unn domit hauptsächlich bayerischer Feierdooch iss, alles Geld für „Bavaria One“, s Lieblings-Projekt vo unner aller Maggus! Ömm Pfingste nedd zu vergesse: alles Geld aus Pfingstmonndich (ihr wüssd scho, der Heilig Geist!) würrd in die Förderung der Hochschulen unn Unis gsteggd. Weiter im Text! Weil aa Fronleichnam unn Allerheilige vuurwiegend bayerische Feierdeech senn: Abschaffung unn alles Geld für die bayerisch-fränggisch Wirtshauskultur mit Schoofkopf unn Co.! N 3. Oktober („Tag der deutschen Einheit“) kappe mer aa widder unn schaffe mit doss Geld n Soli endgültig oo. Bleit noch Weihnochde. Zur Auswahl: mit dem Geld Galeria Kaufhof rett? Odder - weeche s Symbol vo die Christbaam-Kugel - a notleidende Bundesligamannschoffd rett‘? Odder doch die Bundeswehr? Alles Spinnerei! Scheitert allee scho am Veto vom mächtige Raffelshof. Worömm? Wer söll denn dürrt s ganz Bier sauf, wenn’s s legendär  Vodderdoochsfest nix mer gäb??? Servus, der Eustach.