So, jetzt senn mer widder medde dinn in eene vo die schwierigste Zeite im Johr, der Fastenzeit. Jedes Johr s sellwe, wenn die Foosenocht römm iss unn n Öschermittwoch s böse Erwachen künnt. Wobei, die Fastenzeit, die nooch n Fasching 2020 loos gange iss, woor jo ganz besonders lang unn hodd braggdisch drei Johr lang gedauert! Jetzt also widder a ganz „normale“ Fastenzeit, unn ausgereched doo bin ich n Öschermittwoch durch die Frooch als Schlagzeile in die Zeitung aufgschgreggd: „Stirbt die Floskel „Mahlzeit“ aus?“ Erschrogge desweeche, weil‘s grood jetzt, woo mer jo kaum noch woss isst, schmerzhaft iss, zu erfohrn, däss es mit „Mahlzeit“ ball vorbei iss. Dann würds noch ruhiger in unnern ohnehin scho so ruhige Landstrich. Vor allem in unner aller „Medrobole“ Neuscht mit sei Großbetriebe, n Campus unn die ville Verwaltunge. Vorsichtige Schätzunge laffe nämlich doodrauf naus, däss s Wurrd „Mahlzeit“ in Neuscht oo n ganz normale Werkedooch ungfähr 85.000 mo gsocht würrd. „Mahlzeit“ würrd in Firmen zwösche 11 unn 16 (!) Uhr ömmer dann gern genomme, wenn mer jemand begegnet und nedd wääs, woss mer sooch söll. Kenne mer jo alle: s künnd dir jemand entgeeche, du wässd genau, däss du gleich irgendwoss sooch musst, aa wenn‘s noch so bescheuert iss, unn knöörst dann zur Not halt a verweifelt’s „Mahlzeit“ raus. Ganz schlimm iss, wenn dir - egal, zu woffer Uhrzeit - jemand innerhalb vo kurzer Zeit zwee- odder goor dreimoll üüwern Waach läfft. Üblich: beim erstemoll „Mahlzeit“, beim zwettemoll nur a freundlichs Nicken unn bei’s drettmoll dann der legendäre Spruch: „S nächstmoll kossds a Moß Bier!“ Zum Ärgern konn mer „Mahlzeit“ übrigens ausnahmsweis‘ a scho ganz früh am Dooch gsooch. Wenn für 8 Uhr a Besprechung oogsetzt iss, alle doo senn, unn der Letzt‘ n viertel neu reigschlappt künnt. Wenn dann ehner „Mahlzeit“ seechd, iss doss die Höchststrafe! Die gut alt „Mahlzeit“ stirbt also langsam aus, owwer annere, moderne unn bedeutungsschwangere Würrder stehn scho bereit: „Resilienz“, „ergebnisoffen“, „Filterblase“ „Quantensprung“, „an seine Grenzen stoßen“, „alternative Fakten“, odder „Narrativ“ zum Beispiel. Ganz annere Gedanke hodd sich mei Freund Gotthold zur Fastenzeit gemocht: „Wie fastet ächendlich a veganer Antialkoholiker? Er isst a Schäufele unn säuft vier Bier unn drei Schnäps dazu!“ Servus, der Eustach.