Früher hodd mer ömmer, wenn woss roogfalle iss, gfrächd, ob Valentinsdooch iss. Woor a glenner Sprachwitz und hadd‘ mit die heutig‘ Bedeutung von Valentinsdooch überhaupt nix zu dunn. Heut‘ gedd’s doo natürlich ömm ganz woss annersch. Valendinsdooch – der Festtag der Liebenden unn der enzig Dooch im Johr, oo den Männer nachweislich deutlich mehr Blomme käffe als Frauen. Woröm? Weil se müsse! Vorab, wie’s zu den Dooch überhaupt komme iss. Und ömm gleich mit a Gerücht, doss sich hartnäckig hält, aufzurämme: die Gärtnereie unn Blommelääde worrn’s nedd. Namensgeber - nedd überraschend – woor der heilig‘ Valentin aus Rom, der Schutzpatron der Liebenden. Der Valentin hodd im 3. Jahrhundert in Rom gelebt unn Liebespaare nooch christliche Ritus getraut, obwohl doss Kaiser Claudius II. verbote hadd. Der Überlieferung nooch söll der Valentin Blomme aus sein Gorrde oo die frischgebaggene Böörlich übergebe hoo. Deshalb der heutig‘ Brauch. Off Befehl vom Kaiser iss der Valentin n 14. Februar 269 enthaupt‘ wurrn. Ab s 15. Johrhunnert senn in England sogenannte "Valentinspaare" gebild‘ wurrn, die sich gegenseitig glenne Gschenke odder Gedichtlich gscheggd hömm. Englische Auswanderer hömm den Valentinsbrauch mit nooch Amerika genomme unn vo doo iss er durch US-Saldode nooch n Krieg in n westliche Dääl vo Deutschland komme. 1950 goob’s in Nürnberg no n erste "Valentinsball". Unn vo doo oo hodd sich der Brauch in ganz Deutschland verbreit‘, die Blommelääde hömm’s kräftig bewurbe unn die Männer käffe bis heut‘ oo den Dooch tüchtig Blomme für ihr Liebste. Ob’s dann im höhere Alter ömmer noch die „Liebst“ iss, iss froochlich, ower Blomme werrn oft trotzdem noch gekäfft. Passend doozu a Gschicht von Heinz Becker, der mit sei berühmt Familie bekanntlich im Saarland lebt. Er, der Heinz, hodd im Supermakt ghört, wie a Moo, der mindestens so alt woor wie er, „Schatz“ zu sei Fraa gsocht hodd. „Schatz!!! In dem Alter!“, hodd er sich aufgereecht. Und drei möögliche Gründ‘ für doss unmöglich‘ Verhalte aufgezählt: „Entweder der hadd‘ sei Brillegläser mit Salamischeibe geputzt. Oder es iss a Verwechslung. "Oder“ - unn des hält er, der Heinz, für am wahrscheinlichste – „s iss a schlechte Angewohnheit!“ Zum Schluss well ich die Männer noch erschregg: Valentinsdooch iss genau heut!!!!! Servus, der Eustach.