In die letzte boor Mooned hömm sich die Berichte üüwer Leut in unnern Landkreis ghäuft, die scho seit 50, 60 odder goor 70 Johr in ihr Durf Orgel spiele. Höchsten Reschbeggd, sooch ich doo bloß! Woss doo für eine Zuverlässigkeit unn Aufopferungsbereitschoffd dazu ghört - doo könne sich ville Junge a Scheibe oogschneid! Ich woor off Organiste, Baggerfohrer odder zum Beispiel aa Schloochzeuger bei Tanzkapelle scho ömmer neidisch. Woss die gemeinsam hömm? Die Koordination! Händ unn Füss müsse komplett unterschiedlich gsteuert weer. Sauschwer! Setzt dich amoll hie, unn browier, mit dein ausgstreggde rechte Orm Kreise rechtsrum in die Luft zu moole unn gleichzeitig mit dein rechte Fuß Kreise linksrömm zu mache. Doo scheiter ich gnadenlos unn breng doss eefoch nedd hie! Wobei ich sowieso zwee linke Händ hobb unn scho ömmer neidisch off Leut woor, die handwerklich gschiggd senn. Woor noch nie mei Ding unn würds a nie werrn! Nur zwee Beispiele: ich hobb mir amoll n Minibagger bei‘n Wolf in Brend ausgeliehe unn musst den dehemm von Hänger roofohr. Durch sein Aufbau unn die Keede kippt so a Baggerle natürlich, wenn‘s über die Kante von Hänger schräg roo Richtung Ströss gedd. Ich müssed mich, bevuurs kippt, mit die Schaufel off die Ströss obstütz unn dann alles langsam komm läss. Pfeuffedeggel! Mich hodds off dem Gerät so gnadenlos römmgschmisse, däss ich mir alle zwee Knie aufgschlooche hoo! S Baggern sellwer woor noch s eefochst! Odder mei annerer Alptraum: Motorsaache! Scho mo allee s Oomache. A Wissenschaft für sich! Emol bin ich nei’s Durf gelaffe, weil ich den Deifel nedd oogricht hoo, hobb mir die Saache vo n Experte oo läss mach - unn bin mit laufendem Gerät durchs halb Durf hemm gelaffe. Hadd‘ gedocht, ich griech se nix mer oo! Unn dann wollt ich im Gorrde n dürre Baam ömm mach. Die Kinner mit Abstand in Sicherheit platziert, bin ich (mit Birkenstock!) off a Lädder unn wollt erscht die Spetze roo saach. Dheorie gut, Braxis schlecht: die Spetze iss nedd, wie oogenomme, vo mir wegwärts gekippt, sondern hodd sich in mein Richtung gedreht unn mich ball vo die Lädder gewurrfe. Die Kinner hömm sich kaputtgelacht, ich woor mit dürre Noodel übersäät, unn froh, däss ich überlabbt hoo! Unn a Idee iss mer komme: n Baumarkt für Männer mit zwee linke Händ eröffne, unn ihn „Theoretiker“ nenn. Servus, der Eustach.