Mir senn’s jo scho gewöhnt, däss mer alle boor Woche durch Zeitungsmeldunge aufgschreggd werrn, wenn widder irchendwo irchendwoss zuu mecht unn schließt. Owwer jetzt kooms gnübbeldegg! Däss die Anni in Brend („Café Klein“) Ende Dezember zuu mach muss, wösse mer scho länger. Jetzt owwer kam jo ee Eischlooch nooch n annere! Der Dorfladen in Willmars schließt, Brillen-Voigt aa, a Stoffloode in Neuscht hodd zuu gemochd, n Samsdich vuur a Woche hadds „Madenhäusle“ sein letzte Dooch unn jetzt die Noochricht, däss s „Neustädter Haus“ schließt. Mecht ächendlich aa irchendwenn widder amol woss auf??? Aussichtlos! Trotzdem muss mer sich mit die Situation amoll nöher befass. Die Wirtshäuser mache eene nooch die anner zu, owwer die Leut (sprich Männer) gänn - außer zum Middochesse mit Fraa unn Familie - eefoch off ees, zwee, drei odder a mehr Bier jo aa nix mer nei! Ich möcht gewett: wenn ich heut Leut, die jommern, weil jetzt zum Beispiel s Neustädter Haus zuu mecht, frääch, wenn se s letztmo dinn worrn, müssde vill zugebb, däss doss scho fönnef, zääh odder goor mehr Jahr her iss. S sellwe midds Madenhäusle odder annere Fäll. Merr gädd sellwer ganz selten hie, jommert dann owwer, wenn die Meldung künnt, däss die Wirrdschoft zuu mecht. Worömm doss so iss? Ich bin kee Fachmann, denk owwer: der Mensch braucht Optionen. Mööchlichkeide halt. So off die Oord: „Wenn ich wölled, möcht ich gekönn!“ Gidds jo in annere Bereiche aa. Wenn du heut n ältere Mensch s Auto wegnimmst, weil die Fohrerei aufgrund vo sei Alter zu gfährlich wurrn iss, iss s Hauptbroblem nedd, däss Sie odder Er nix mer fohr döff, sondern däss kee Auto mehr in die Karaasch städd. Wie ich gsochd hobb. Woss dann fehlt, iss „Wenn ich wölled, möcht ich gekönn!“ Gedd nix mer, die Kiste iss verkäffd unn furrd! Der Mensch braucht Optionen. Wie bei „Mensch ärger dich nedd“, wenn’s off‘s End zu gädd: so lang du für’s Haus alles gewürfel konnst, ömm neizukomme, isses gut. Owwer wenn du scho drei Stee dinn hossd unn dir die Optione ausgänn, würrd’s richtig schwer. Am End noch amol zu den Stoffloode, der in die Neuscht zuu gemochd hodd. Nix geeche den Loode – owwer für uns Männer iss a gschlossener Stoffloode scho irchendwie leichter zu vergroffde, wie a gschlossene Wirtschoffd. Doss würrd doch wohl jeder verstänn, odder??? Servus, der Eustach.