FREDI BREUNIG

Fredis Glosse

Musikante unn Fußballer (Mundart)

11.10.2022

Neulich woor widder Oktoberfest in Weisbich unn weeche Corona woor doss mei erschts Bierzelt seit drei Johr. Ein Genuss! Kesselflääschesse n Mondichowerts – mei Lieblingstermin bei jedes Fest! Sämtliche Kesselflääschfraktione vom Landkreis worrn vertrete, s Zelt vool, unn a Stimmung, wie wenn’s nie a Krise – egal woss für eene – geewe hädd. Krisen hömm derzeit jo aa ville Vereine, insbesondere die, die Mussig spiele. Kee Leut! Owwer der Verein, der n 26. September ins Bierzelt in Weisbich gspielt hodd, für den iss Krise a Fremdwurrd. Ich hobb meiner Aache ball nedd getraut! Setzt doch die Trachtenkapelle Frankenheim mit gschätzt 40 Leut off die Bühne! Riesen-Besetzung, vier Bäss!!! Herrlich! Ja, doss worrn halt noch Zeite, wie die Mussigkapelle in die Dürfer in die 1970er Johrn nur so ausm Boode gsprießt senn unn nedd selten aa in’s glennst Dürrfle 30 odder 40 Leut hadde. Unn dabei gabs mit Fußballer, Schütze, Reserviste, Feuerwehr unn Sänger jo jede Menge Konkurrenz! Däss jemand neewe die Mussig aa in die Feuerwehr woor, woor normal, owwer däss jemand Mussig und Fußball gspielt hodd, eher a Seltenheit. Die ruhigere unn die, die gewichtsmäßig a weng besser beinanner worrn, senn zu die Mussig, die schlanke, agile, sportliche zunn Fußball. Bei die Mussig woor aa noch die Frooch, woss für a Instrument du spielst. Für die Mädlich woorsch süsst fast ömmer die Klarinett‘, bei die Bube woor die Auswahl grösser. Unn Vergleiche mit die Fußballer senn durchaus möglich. Der Bassspieler iss wie der Tormann, s übrig tief Blech wie die Verteidiger, die Begleitung wie s Mittelfeld unn die Trompeter wie die Stürmer. Der erste Trompeter woor der Star, den jeder bewunnert hodd, wie n Mittelstürmer unn Torjäger bei die Fußballer. Für mich ömmer noch wunderboor unn fast rührend, wenn ich eene vo unner Mussigkapelle seh unn hör: 20, 30 odder aa 40 Leut vo a Durrf dunn sich zomm, beschaffe sich Instrumente, lerne s Spiele unn hömm dann Spaß droo, für a Moos Bier, a Broodwurscht odder a Spezi (die Klarinette ……) eefoch zommzusitze, Mussig zu spiele unn die Leut zu unterhalte! Eefoch so unn ganz unaufgereechd. Herrlich! Unn een entscheidende Vorteil hömm die Mussikante im Vergleich zu die Fußballer: sie könne scho mit’s Biertrinke oogfang, wenn’s Spiel(e) los gedd, die Fußballer müsse worrd, bisses aus iss …… Servus, der Eustach.


<< zurück