Jetzt, mit a weng Abstand, well ich noch amol off die Beisetzung vo die Queen in England zurückkomm. Woor der Hammer, odder? Insgsamt muss mer sooch: Reschbeggd vuur die Engländer, weil so schnell mecht doss denne keener nooch! A Organisation vom Feinste unn nix n Zufall überlässe. 4,1 Milliarden Zuschauer weltweit worrn dabei unn hömm oo ihrn Fernseh zugeguggt. Ich natürlich aa. Stundenlang! Eine Riesen-Verantwortung, die doo off alle geleeche woor, die dabei worrn. N gelassensde kannt noch die Queen sellwer gsei, owwer alle annere Akteure iss der Oorsch wohrscheinlich off Grundeis gange! Woss doo alles bassier konn, wenn üüwer 4 Milliarden Leut live zugugge! Eener vo die Saldote, die Ehrenwache halte, könnt ömgfall (wie’s jo dann in Westminster Hall aa bassiert iss), eener vo die Trauergäst könnt aus die Reih ausgebrech, unn offn Sarg zugstürm (wie’s aa bassiert iss) odder die Gäul könnte durchgegäh (wie’s bei die Beerdigung von Königin Victoria 1901 bassiert iss). Alles live im Fernseh! Unn mer könnt die Szenarien jo off die Spitze getreib. Stellt euch amoll vüür, mer hätt‘ zum Beispiel vergesse, den Leichewooche, mit dem die Queen letztlich vo London 35 km weit nooch Schloss Windsor gforrn wurrn iss, zu tanke unn wär‘ just off die eindrucksvolle letzte Kilometer zum Schloss hie („long walk“) leergforrn. Woss sich doo im Auto oogspielt hädd: „James, wieso ruggeldsn off eemo soo???“ Unn der James: „Au! Der Tank!!!“ Der nobel Jaguar wäär off emol stänn gebliebe unn 4,1 Milliarde hädde sich gfräächt, woröm. Zwee Leut häddes gewössd: der James unn sei Beifohrer, der Charlie. Die Blamaasch! Unn wie hätt mer die Situation gerett, bei a Veranstaltung, wo alles militärisch zackig, im perfekte Gleichschritt unn ömmer rhythmisch oolefft? Der Charlie wär elegant ausgstieche, zum Trommelklang hinnersch Auto marschiert unn hätt mit a zackige Bewegung die Heckglabbe aufgemocht. Hätt‘ mit sei weiße Händschich n Ersatzkanister raus, n Tankdeckel aufgemocht unn vuurnahm n Schnurchel nei n Tank gsteggd. Hädd - vuur 4 Milliarde Leut‘ – fönnef Sekunde geworrd, dann mit einer widder zackigen Bewegung n Kanister hochgelupft, unn n Diesel nei n Tank läss blubber. Kanister widder schneidig zurück, Deggel zu, eigstieche unn die Queen weitergforrn. Wer sich wie iich, solche Gedanke mecht, muss scho a weng n Schlooch hoo, odder? Servus, der Eustach.