Weil mer allerweil oft hört, wie teuer s Baue wurrn iss (unn ömmer noch teurer würrd), hobb ich droo gedocht, woss mir mei Leut ömmer verzählt hömm. Ihr Haus, in dem ich groß wurrn bin, hodd domols, 1958, 30.000 Mark gekossd! In Worten: dreißigtausend! Mark! Also 15.000 Euro. Doss kosst heut die berühmt Giebelspitze, die’s in Zeite von Flach- unn Pultdächer kaum noch gidd. Die 30.000 Mark musste mei Eltern bei die Bank aufnehm – unn hömm selten ruhig schloffe, bis die letzt Mark zurückbezohlt woor. Wenn mer nöher doodrüü noochdenkt, merkt mer schnell, wie komplett annersch die Zeite unn die Leut domols worrn. Mer hat noch richtig Gewissensbisse ghood, unn sich für Zeug gschamt, wodrüü heut kee Sau mer aach nur n Gedanke verschwend dääd. Unn wenn mer ehrlich iss, steckt doss alles, woss mer in die 1960er, 70er Johr erlabbd hodd, scho noch tief in een dinn. „Woss sooche denn doo die Leut?!“ hömm mir oft zu hörrn gricht, wenn’s widder mo ömm n Hoorschnitt, die Klamotte, n Kirchgang, a evangelische Freundin (!!!), n dromm Rausch odder goor a zommgfohrns Auto gange iss. S furchtboor Hemm, doss mir vo die Tante zunn Geburdsdooch gschenkt gricht hadde, musste mer beim nächste Besuch bei ihr nooziech. Unn s berühmt afrikanisch Sprichtwort „Um ein Kind zu erziehen, braucht es ein ganzes Dorf“ stimmt jo aa. Wenn du früher woss oogstellt hassd, hossde schnell gemerkt, däss die alt Generation zommghalde hodd wie Pech unn Schwefel unn alles sofort dei Leut zugedrooche wurrn iss. Däss die Erziehung, für die ich übrigens orch dankbar bin, heut noch in een steggd, merk mer oo Verhaltensweise, die bei Leut in mei Alter vielleicht goor nedd so selten senn. Beobacht euch sellwer. Zum Beispiel s Gfühl, wenn mer in n Supermarkt durch die Kass gedd, ohne woss gekäffd zu hömm. Odder mer hodd woss gekäffd, es aa brov bezohlt, unn gedd dann durch die elektronisch Schranke, die Alarm schlööd, wenn s Sicherungsetikett nedd roogemocht wurrn iss. Komisch aa scho vurher, wenn mer a Hose odder a Jacke zum Oobrowiern nei die Hand gedröggd gricht, ohne zu wösse, woss se kost söll. Verzweifelt prowiert mer, s Preisschild unbemerkt so zu schütteln unn zu drenn, däss mer n Preis kurz sidd unn no die Kunst fertig brengt, ihn in n Bruchteil vo a Sekunde aach les zu könne. Hünd senn mer scho, owwer halt schamerte! Servus, der Eustach.