Mir Leut hömm’s nedd gern, wenn uns woss vuurgegaugeld würrd. Doss kannd mer erscht vuur zwee Woche widder erleb, wie in Vorbereitung vo die Landdoochswohl in Nordrhein-Westfalen die zwee Spitzenkandidate Hendrik Wüst (CDU) unn Thomas Kutschaty (SPD) zum unvermeidliche Fernsehduell geecheananner oogedreede senn. Weil der Hendrik Wüst 1,91 m groß, der Thomas Kutatschy owwer nur 1,70 m glee iss, hodd mer ihn, n Kutatschy, kurzerhand off a Podestle gstellt. Däss der Größenunterschied deutlich glenner woor wie die doch beträchtliche 21 cm. Schmuu!!! Doo isses bei die Bundestagswahl letzts Johr scho ehrlicher zugange. Ich konn mich nämlich nedd droo derinner, däss mer n Olaf Scholz im Fernsehduell geechn Armin Laschet domols a boor Hoor off die Bladde geklebt hädd. Owwer worömm hömm glenne Männer angeblich wallich Brobleeme? Däss der Napoleon mit sei 1,68 m Komplexe hadd, iss bekannt. Aa bedenklich: der Kim Jong Un misst 1,71 m, der Putin ner 1,70 m. Unn der Nicolas Sarkozy, von 2007 – 2012 französischer Staatspräsident, 1,65 m glee, hodd angeblich nur Leibwächter eigstellt, die glenner worrn wie er. Unn sei Fraa, die Bruns Carla, 1,75 m groß, durft nur Schüh mit floche Sohle nooziech, wenn se mit ihr glenns Zündhütle onderwaachs woor. Wie hädd mei alter Freund Walter Mauer mit entwaffnender Logik doozu gsocht: “Grooß iss er nedd, owwer glee!“ Owwer scho intressant, woss mer alles erföhrt, wenn mer sich über doss „Brobleem“ vo glenne Männer informiert. Frauen fühle sich vo grösse Männern angeblich besser beschützt wie vo glenne. Außerdem wär „a lange Läng“ a Zäche für Gsundheit, gute Gene und Status. Unn: die Grenz, ab der Männer kee Brobleeme mer mit ihr Größ‘ hömm, iss angeblich 1,73 m. Woss die alles wösse! Ich konns nedd beurteil, ich mess 1,81 m unn bin domit ganz zufriede. Leicht isses sicher nedd, wenn mer glee iss. Soo wie in eene vo die erschte Witz, den ich scho als glenner (!) Buu ghört hobb. A weng kurz geroodener Pforr hodd sich bei die Predigt ömmer of a Holzkistle gstellt, däss er üüwer n Ambo gegugg kannd. Dann hodd er in sei leidenschaftlich Predigt loosgeleecht unn üüwer s Fluche gezankt. Just in dem Moment hodds onnder ihn gegnaggsd unn s Holzkistle hodd sein Geist aufgaawe. Unn s Pförrle hodd geblärrd: „Liebe Leute, fluchet nicht, Sackzement, mei Kistle bricht!!!“ Servus, der Eustach.