So, drei Dooch noch, dann isses widder soweit, unn es hässd aufgebassd: 1. April! Der Dooch im Johr, oo dem Leut gern „nei’n April gscheggd“ unn somit veräbbeld werrn. Owwer mer muss doch feststell, däss die Zeite für April-Scherze noch nie so schwer worrn wie heut. Woss früher noch relativ schnell unn leicht als April-Scherz zu erkenne woor, funktioniert heut nix mer. S gidd jeden Dooch soviel Meldunge, wo mer denkt: „Nee, wallich nedd, odder??? Doss konn doch nedd gsei!!!“, unn dann schnell feststellt, dässes doch wohr unn kee Witz odder Scherz iss. Wie leichts früher woor, in die Zeitung n schönne April-Scherz zu mache, iss a Gschicht, oo die ich mich gut derinner konn. Domools woor oo n 1. April zu lese, däss in Zeiten vo Hybrid-Säu die Tierlich ömmer länger werrn, desweeche in die Medd oon Bauch durchhenge unn offn Boode schläffe. A Bauer hätt jetzt a Sau mit sechs Bee gezücht, unn die hätt sich aa scho vermehrt unn Junge gricht. Aa die natürlich alle mit sechs Beelich. Off a schönne Fotomontage woor die glücklich Sau-Familie zu sehn unn es hieß, däss alles am 1. April nochmiddooch n drei Uhr vor Ort besichtigt weer koo. S gäb Broodwürscht unn Bier. 50 Leut worrn doo ……… Doss worrn halt noch Zeiten! Heut? Nur ee Beispiel für a Meldung, die mer noch vuur a boor Johr sofort als April-Scherz eigstuft hädd. Owwer sie iss Tatsach. Überschrift: „USA: Priester verwendet falsches Wort – tausende Taufen ungültig“. Und die Meldung dezu: „In Phoenix, USA, hat ein Priester jahrelang fälschlicherweise den Plural beim Taufen verwendet. Mit weitreichenden Konsequenzen. Alle Taufen sind ungültig! Statt der korrekten Formel „Ich taufe dich ……..“ sagte der Pfarrer jeweils „Wir taufen dich ……..“, und verursachte damit tausende ungültige Taufen.“ Unglaublich, odder? Unn s ging noch weiter. Ein Fachmann: „Eine ungültige Taufe macht alle nachfolgenden Sakramente ungültig, insbesondere die Firmung, die Ehe und die Priesterweihe“. Die Ehe also aa! Jetzt well ich jo nedd unk, owwer ich konn mir lebhaft vuurgstell, dässes jetzt den eene odder annere nedd ganz so glücklich verheierte Moo gidd, der den Broode riecht und krampfhaft überleechd, wie er rausgebreng könnt, woss für a Taufformel der Pforr, der ihn vuur fuchzig, sechzig Johr gedäffd hodd, domools verwendt hodd. Würrd halt sauschwer werrn – unn die Sau bräucht sechs, wenn nedd ocht Bee! Servus, der Eustach.