FREDI BREUNIG

Fredis Glosse

Eingeborene, Immigrande unn Outsider (Mundart)

15.03.2022
Ees gleich vorweg: mit die Ein- odder Auswanderung vo Leut aus odder in Länder hömm die Begriffe in die Überschrift bei dem, ömm däss es mir heut gedd, nix zu dunn. Es gedd mir nämlich ömm „digital natives“, „digital immigrants“ unn „digital outsiders“. Mit „digital natives“ senn die gemeend, die schon in die digital Welt neigeburrn wurrn senn (so ömm 1985 geburrn), „digital immigrants“ senn die, die scho erwachsen worrn, wie die Computerwelt komme iss, unn die „digital outsiders“ welle mit all dem überhaupt nix zu dunn hobb. Ich mit mei 62 Johr offn Buggel seh mich eindeutig als „digital immigrant“ unn komm mit dem ganze Werk einigermaßen zurecht. Mit Betonung off „einigermaßen“. Es iss owwer aa nedd leicht in die moderne Zeite mit Smartphones, Tablets, Laptops unn moderne Männer-Klo’s = Bissoirs. Worömm Bissoirs? Heut, wo mer sei Wischkästle jo ömmer unn üüwerool dabei hobb muss (s gidd kaum noch junge Leut, die selbst beim Blutspende off die Liege nedd mit ihr Kistle römmspiel müsse!), hodd mersch eewe aa dabei, wenn mer als Moo vur a blank gebutzts Biesbegge städd. Unn wenn dir dei Telefon just in den Moment aus die Händ gleit unn ins Wasser nei blumbsd, konnst du nedd furrt unn irchendwoss zum Rausfische ghol. Läffsd du nämlich furrt, spült die Kiste automatisch, unn dei Gerät iss furrt! Also musst du eisern stänn blei, bis jemand künnt unn dir höllfd. Unn für uns Ältere aa nedd leicht: Mitglied in a WhatsApp-Gruppe zu senn. Doo schalte sich mehrere Leut zomm, ömm sich gegeseitig Noochrichte unn Informatione zu schegge. An sich ganz sinnvoll, owwer s hapert oo die Disziplin. Eene vo die Regeln: wenn jemand in die Gruppe Gebuurdsdooch hodd, gratulier nie in die Gruppe, sondern schreib der- odder demjeniche außerhalb. Wenn nämlich 50 Leut in so a Gruppe senn unn eener fängt oo, zu gratulieren, fühle sich alle verpflicht, doss aa zu mache unn s nimmt kee End. Ständig klappert die Kiste unn du musst drauf gugg. Odder jemand erzählt üüwers Handy n Witz in die Gruppe unn drei Dooch später scheggd eener n „Daumen nach oben“. Kee Sau wääs dann mer, worömm. Dja moderne Zeiten – aach im Auto: „Hey, Mercedes, mir ist kalt.“ Mercedes: „OK. Stelle die Temperatur auf 25 Grad.“ Aber: „Hey, Tesla, mir ist kalt.“ Tesla: „Mir auch! Halt‘ einfach die Klappe und fahr weiter, sonst kannst du den Rest nach Hause laufen!“ Servus, der Eustach.

<< zurück