Heutzudooch, wo die Spritpreise nur ee Richtung kenne, schlööd widder die Zeit vo die Spezialiste, die ömmer wösse, wo die zunehmend unerschwinglich Flüssigkeit grood billig iss. Unn dann gidds noch den gloorreiche Roodschlooch, nei’s Ausland zu fohrn, weil dürrd Benzin unn Diesel viel billiger senn wie bei uns in Deutschland. Gut, wenn ich jetzt in die Näh vo soo a Grenz wohn (Thüringen würrd uns leider nedd vill nütze!), läss ich mir doss eigeh. Owwer bei uns? Unn trotzdem musst du mit recher, dässes Leut gidd, die lese, däss der Diesel zum Beispiel in Luxemburg nur 1,44 Euro statt knapp 1,70 kossd – unn sich offn Waach mache! Jemand vo Ööwerweißebrönn dääd ich jo noch versteh, weil doo bissde jo scho fast hallwer dürrt. Oowwer wenn du zum Beispiel in Sternberg wohnst? Nee, Schmarrn, mecht natürlich nedd vill Unterschied. Owwer wenn irchend so a heller Koopf doch off die Idee käm? Die kürzt Entfernung vo Neuscht bis zu die erscht Tankstell in Luxemburg (Mertert) senn hie unn zurück 714 km. Wenn dei Auto 6 Liter off 100 km braucht unn du nur in Deutschland tank däädsd, würrde dich die insgsamt 714 km ungfähr 73 Euro kossd. Tankst du für die Hemmfohrt owwer in Luxemburg, reduziert sich alles off 67 Euro! „Sechs Euro gspoort!!! Derre hobb ichs gezeigt!“ dääd mer dann hör. Ja, mir senn doch nedd blöd! So ähnlich denk ich aa ömmer, wenn mich mei Fraa mit Gutscheine zunn Beck scheggd. „2 für 1 Streusel-Käsekuchen“, „1 Dinkel-Baguette für 1 Euro“ odder „3 Salzstangen für 1 Euro“ stedd doo droff. „Brauche mer doss wallich?“ frääch ich mei Fraa ömmer. „Ächendlich nedd, owwer mir senn doch nedd blöd! Doss nemme mer midd!“ No daggel ich los unn hol doss ganz Zeuch, doss mir ächendlich goor nedd bräuchte billiger. Noch schlimmer senn die Gutscheine der Kategorie „3 Quarkbällchen gratis“ odder „2 Braumeisterbrötchen gratis“. Weil ich’s als höflicher, wohlerzoochener Rhön-Grabfelder Äborigini eefoch nedd üüwersch Herz breng, nur doss Gratis-Zeuch für die Gutscheine zu fechte, nehm ich noch zwee beleechte Bröödlich, drei mürbe Hürrnlich, a Brood unn zwee Gropfe mit. Brauch dunn mer doss alles zwoor aa nedd, owwer mir senn doch nedd blöd! Unn ömmer wenn ich aus dem Gschäft raus geh unn die Gutscheine eigelöst hobb, künnt doss herrlich Gfühl hooch: „Die hömmer schöö ausgschmiert!“ Servus, der Eustach.