Schildbürgerstreiche kennt ihr alle. Der bekanntst für mich iss der, wo die Schildbürger im Krieg ihr Kircheglogge versteggel wollte. Hömm se von Kirchturm roo off a Boot geloode, senn offn See naus gfohrn unn hömm die schwerr Glogge versenkt. Unn der Schmied hodd sei Messer raus, unn oo derre Stell, wo se die Glogge versenkt hömm, a grösse Kerbe nei‘n Bootsrand gschniede. Dässe die Glogge später widder finne. Subber! Oft beteiligt bei moderne Schildbürgerstreiche: die öffentliche Hand. Hodd jetzt in Form des Straßenbauamts Schweinfurt bei Gerolzhofen widder mo zugschlooche. Unn weil Gerolzhofen soweit wagg iss, erklär ich‘s oo n Vergleich doo bei uns. Stellt euch vuur, ihr welld vo Stetten nooch Hausen fohr. Alles gloor. In Stetten nooch den schorfe Rechtsgnigg oo die Wirrdschoffd „Zur Linde“ vorbei, zuss Durff naus Richtung Floodunge unn dann links ab nooch Hausen. Kee Frooch, odder?! Dääd jemand ernsthoft off die Idee komm, erscht weiter Richtung Floodunge zu fohrrn unn dann üüwer den relativ neue Kreisel middn grösse Ömmwaach ins Fridolin-Link-Reich zu reisen? Wohl kaum! Dovoo gädd s Straßenbauamt Schweinfurt owwer anscheinend aus. Zur Erklärung: wenn merr vo Frankenwinheim nooch Brünnstadt fohr will, isses wie vo Stetten nooch Hausen. Zuss Durrf naus unn dann gleich links ab nooch Brünnstadt. Wenn mer nedd oobiegt unn groodaus fohr dääd, käm mer nooch Gerolzhofen. Soo wie von Stetten nooch Flodunge. Unn jetzt künnts: s Straßenbauamt hodd kurz vuur GEO bei n Kreuzungsömbau, der insgsamt 150.000,-- € gekossd hodd, für 40.000,-- € a großzügige Linksabbiegerspur gebaut, off die wohrscheinlich nie jemand föhrt. Weil alle weit vuurher scho oogebooge senn. Kurz nooch Frankewinnem. Die weiße Pfeile off die Abbiegespur werrn also jahrelang weiß wie Schnee bleiwe! Dja, unn woos mecht mer jetzt mit a noochelneue Linksabbiegerspur, die nutzlos iss wie a Groopf unn die doo, wo se iss, kee Sau braucht? Genau! Middn grösse Bagger abreiß, offn Tieflooder drauf lood unn doohie fohr, wo se dringend gebraucht würrd? Wo? Saal an der Saale! Der neu Supermarkt linker Hand Richtung Wülfershause, der weeche a fehlende Linksabbiegerspur nedd komme iss! Sollt 1,2 Millione kossd! Unn onnde in Gerolzhofen iss eener für lommbede 40.000,-- € übrig! Also Straßenbauamt SW! Doss isses! Ärmel hooch, unn los! Servus, der Eustach.