N 29. Oktober woor Weltspartag. Wie ich doss geleese hobb, hobb ich erscht amoll überlegt, obb sowoss in Zeiten vo Negativzinse überhaupt noch Sinn mecht unn obbs den Weltspartag wallich noch gidd. Anscheinend scho. Die Banke unn Spoorkasse müsse jo schließlich ihr Luftballongs, Kuscheltiere unn Spoordose irchendwie losweer. Weltspartag. Doss hört sich heut oo wie a Relikt aus längst vergangene, kuschelige Zeite, in der die Mark noch a Mark wert woor unn schöö brov neis Spoorsäule gschmesse wurrn iss, ömm langsam owwer sicher (mit Betonung off langsam) die erscht Million aufzubaue. Heut? In Zeiten vo cum-cum, cum-ex, Derivaten, Diversifikatione, Investmentbankern, Multi-Asset-Fonds unn Absenzkapitalismus fällts scho schwer, noch oo a Porzellansau zu glääwe, die vo Kinner schöö fleißig mit Geld gfüttert würrd, ömm irchendwenn zum Schlochte nei die Bank gedrooche zu werrn. Geld, Geld unn nochamoll Geld! Die ganz Welt rennt ner bloß noch dem schnöde Mammon hinnerher unn treibts zum Dääl wallich off die Spetze! Die oowe scho erwähnte cum-cum unn cum-ex - Gaunereie zum Beispiel. Doo gädds kurz erklärt ömm Geldgschäffde, die sich rund um den Dooch im Johr obbspiele, oo den für a Aktie die Dividende fällig würrd. Ömm den Dooch römm würrd die Aktie schnell zwösche Banke, Investore unn Fonds hie unn her gschoowe. Durch den schnelle Handel mit die Aktie konns Finanzamt nur schwer verfolch, wer se ächendlich wann hadd. Mits Ergebnis, däss s Finazamt gleich mehrere Steuerbescheide ausstellt unn sich die Investore mehrfoch die Steuer zurückerstatt lässe, obwohl se teilweis kee enzichs moll a Anrecht drauf hadde. Mer vermeid also nedd bloß die Steuer, mer holt sich aufgund vo a Gsetzeslücke aa noch zusätzlichs Geld! Für uns Normalsterbliche, ooständiche Leut mit Spoorsäu dehemm nedd zu bligge, für ville windiche und geldgierige Finanzhaie völlig normal unn legitim. Neulich woor eener ins Fernseh unn hodd doss, woss er mit cum-cum/cum-ex middn Staat mecht, so erklärt: „Es ist, wie wenn ich zu meiner Tochter sage, sie soll vor Mitternacht zu Hause sein. Wenn sie dann eine Minute vor Mitternacht kommt, aber zwei Minuten danach wieder geht und ich sie darauf anspreche, sagt sie: „Was willst du denn? Ich war doch vor Mitternacht da!“ Noch Fragen Kienzle? Nee, vo mir nedd. Ich geb auf! Servus, der Eustach.