FREDI BREUNIG

Fredis Glosse

Ich bin doch nedd blöd! (Mundart)

26.10.2021
Ja, ihr oohnds wohrscheinlich scho. Heut gedd mersch ömm die Werbung. Ich glebb, s gidd nedd vill annere Dheme, die uns alle mitenanner dermaßen aufreeche, wie blöde Werbung. Ich sooch nur ee Wurrd: „Seitenbacher“. Hör mir auf!!! Wenn ich doss scho hör: „Woischt, Karle ……“. Check24, Tipico unn „Ich hab mir ne neue Matratze gekauft“ gädd in die selb Richtung. Nervig unn mer konns nix mer ghör! Komischerweis: je länger es a bestimmte Werbung nix mer gidd, ömmso lieber hodd mer sche. Im Nochhinei. Wie ömmer: alles, woss lang her iss, würrd verklärt unn woor bei rüggwärrdicher Bedrochdung goor nedd so schlimm. Die Bundeswehrzeit zum Beispiel. Odder eewe die Werbung vo süssd: der Persil-Moo, s HB-Männle, Camel-Filter, die Klementine, Tilly vo Palmolive, Bärenmarke, Asbach-Uralt, Frolic, Aral, der Käpt’n Iglo und und und. Owwer seid ehrlich: geeche die heutich, „personalisiert“ Werbung woor doss doch alles a Dreeg! Wenn du‘s nedd seh wollst, hossde keen Fernseh geguggt unn fertich. Heutzudooch? Kein Entrinnen! Personalierte Werbung ins Inderdedd. Furchtboor! Du wissd neue Gummistiefel, süchst ins Indernedd römm, denkst dann owwer, däss du doch noch a Johr worrdsd. Vergeess es! Schnell senn die Hünd!!! Egal, woss du ab die nächst Minudde ins Netz aufrufst (www.mainpost.de, www.badfuessing.de, www.doppelherz.de): Gummistiefel, bloß noch Gummistiefel. N dredde Dooch konnsde keene mehr gseh! Unn sehnst dich nooch Seitenbacher-Werbung im Fernseh. Doo konnsde dir schnell die Ohrrn zughalt. Owwer ins Indernedd? Keine Chance! Die Gummistiefel verfolche dich bis nein Schloof! Ower nedd mit mir! Ich krieg se jetzt droo! Ich süch oo unnern Kombjuder nooch Hünneraachepflöster, Brahmeöl, Franzbranntwein unn Durschtzüggelich, däss die ins Indernedd denke, ich well nooch Vierzehheiliche wall. Gleich denooch söll mei Fraa nooch a Luther-Bibel (die walle nedd) unn n Schaukelstuhl süch, der Enkel nooch n Saufurlaub off Mallorca odder Ibiza unn die Schwiegermutter nooch a neus Gehwächele, Grügge unn Stützströmpf. Doomit senn die voss Indernedd sowos vo durchenanner unn verwirrt, dässe s „www“ komplett ooschalte. Dann hol ich mir zur Feier des Tages a Seitenbacher-Müsli aussn Kühlschraank, sauf n Asbach-Uralt dezuu unn rauch a Camel-Filter. Derre geb ich!!! Ich bin doch nedd blöd! Servus, der Eustach.

<< zurück