FREDI BREUNIG

Fredis Glosse

Begegnunge unn Symbolhandlunge (Mundart)

31.08.2021
Je nochdem, wie langs nooch die Bundestagswohl n 26. September dauert, bis mer a neue Regierung hömm, senn die Dooch vo unner aller Angela als Bundeskanzlerin gezählt. Sie iss jetzt off Tour unn sücht noch amoll die Begegnung mit die Staatsfrauen unn -männer vo die Welt, ömm sich zu verabschiede. Abroboo Begegnunge. Wen ich allerweil jeden Dooch alle boor Meter begeechn, iss die Dorothee Bär. Es nervt! Egal, obs dause Bindfäde reend, es dehemm nix gscheits zu Esse geebe hodd odder mer grood zu a Darmspiegelung odder süsst woss Blöds fohr muss: sie lacht! Sie lacht unn lacht! Sie iss eefoch die, die immer lacht. Die immer lacht, die immer lacht, die immer lacht. Doss Lied, ihr wösst scho. Ower gut, spätestens n 27. September könne mer widder befreit, widerwärtig unn ohne Wahlplakate durch die Geechend gfohr. „Begegnungen“ iss sowieso a Wurrd, doss meim Empfinde nooch fröhliche Urständ feiert. Begegnunge hinne unn vurrn unn rauf unn noo! Offn Kirchezeddel: „Um 19 Uhr feiern wir die heilige Messe, anschließend findet eine Begegnung statt.“ Hässd off gut Deutsch: nooch die Kirch saufe mer noch een! Zurügg zu die Angela Merkel unn ihr Abschiedstournee: neulich woor se jo aa bein Putin in Moskau unn bei so en Besuch senn sogenannte Symbolhandlunge unverzichtboor. Woss senn Symbolhandlunge? S erscht Spargelstechen jedes Johr mit die Landwirtschaftsministerin zum Beispiel, die erscht Weinlese mit die Weinkönigin odder der berühmt-berüchtigt Spatenstich (mit schönne gelbe Helm!), wenn a Baustell eröffnet würrd. Gschaffd würrd bei alle die aufgezählte Anläss so gut wie nix, s würrd nur so gedönn als ob unn däss halt a schöö Bild nei die Zeitung künnt. Unn die Symbolhandlung schlechthin, die mir ömmer widder auffällt unn die sich soo scho tausedmoll wiederholt hodd? Ich beschreibs euch. A Kraanz würrd vo n Brominende niedergeleechd, so wie eewe neulich vo die Angela Merkel in Moskau. So weit, so gut. Owwer jedes moll, wenn so a Kranz niedergeleechd iss (meistes lichd er jo scho dürrt), gädd die brominend Person hie unn muss die Schläffe mit den Grußtext noch amoll richt. Gut, oft gädd der Wind. Owwer worömm brenges die Protokoller nedd fertig, die Schläffe so schöö unn ordentlich für ihr Chefs hiezurichte, däss die nedd jedesmoll noch amoll noochricht müsse??? Schlommber!!! Servus, der Eustach.

<< zurück