So langsam ärger ich mich, däss ich scho zweemol geimpft bin. Jetzt, wo die grösse Belohnunge komme, wenn mer bis jetzt nedd wollt und sich nuu doch noch impf lässt. Woss doo wohl alles gidd unn oogeboode würrd? A Lotterie wie in Amerika, nur halt a boor Nummern glenner? Vielleicht ee Johr lang Kreuzbergbier, jede Woche frei Haus geliefert? Odder n Blatz gleich neewe n Landrood bein Weideabtrieb in Ginolfs? Odder noch besser: a Dröggerle, wo mer sich voss Auto aus in Neuscht bequem jede Ampel grün gschalt konn? Doss wärsch doch! Ja, jetzt senn mer so weit. S gidd mehr Impfstoff wie gebraucht würrd. Iss doch ömmer so. Wenn irchendwoss knapp iss, wells jeder, unn wenn genug doo iss, intressierts keen mer. Unn die Bollidig würrd rührig unn überbiet sich mit Ideen für a höchere Impfquote. „Impfen am Strand, in Kirchen, auf Festivals“. Odder der Söder: „Impfen to go“. Domit licht er owwer falsch, unner Landesvodder. „Impfen to go“ versteh ich so, wies bis jetzt woor. Ich geh neis Impfzentrum odder zu mein Hausoorzt, hol mer mei Impfung oo unn geh widder hemm. Wie bei „Essen to go“ halt. Woss der Söder meend, müssd ehrer „Impfen auf Rädern“ häss odder so. Wenn die Leut nedd zunn Impfstoff künnt, muss doss kostbare Gut halt zu die Leut komm! Mööchlichkeite gääbs genug für a sogenannts „niederschwelliges Impfangebot“. Vo die Ampel in die Neuscht hatt ichs jo scho. 14 Stück zwösche Niederlauer unn Geis-Kreuzung. Unn jeder städd do logger soo lang, dässes für a Impfung lang dääd. Die Aufklärung unn s Worrde denooch müsst halt wegfall. Doo döff mer nedd so genau sei. Impfteams oo die Ampeln postiert, geworrd, bis alle Auto stänn, dann hie, aufgfordert, s Fenster roozulässe, senn die Oberorm links unn rechts scho frei verfügbar. Zugstoche, Fenster zu, unn ab. Unn wenn doch jemand Wert off n ordentliche Ablauf leecht. Aufklärungsgpräch unn Desinfektion oo die erscht Ampel, bei die nächst dann die Impfung unn wenns een oo die übernächst Ampel ömmer noch gut gädd, döff er weiterfohr. Woss der Markus Söder aa noch vuurgschlooche hodd, iss „Impfen an ungewöhnlichen Orten“. Tatsächlich! Dja, ich seh scho die Bilder vuur mir. A Impfteam kämpft sich im wabernden Herbstnebel üüwer Stockheim unn Willmars bis noch Filke durch und impft dann Wanderer direkt oon berühmt-berüchtigte Mauerschädel. Servus, der Eustach.