Heut gädd mersch ömm a offn erscht Bligg komisch Dhema: Kläranlage. Unn worömm? Weil ich gelese hobb, däss mer mit Abwasser aa die Corona-Entwigglung verfolg könnt. Echt! Fachleut beschwern sich scho, weil doss nedd mehr wie bis jetzt genützt würrd. Zwee Dinge könnt mer gsee: zum eene die Zu- oder Abnahme vo die Virenkonzentration unn zum annere, woss für Corona-Varianten im Umlauf senn. Do müsst für die Behörden unn vor allem Krankekasse bei Kläranlage doch mehr geh! Zum Beispiel däss alle Leut, die oo die Kläranlag in Wölferschause oogschlosse senn, fetter esse wie die, derre ihr Zeuch nei die Kläranlag vo Mellrichstodt lefft. Odder däss die Abwassererzeuger für die Kläranlag in Hohenroth mehr saufe, doodefür die Leut vo die Kläranlag in Könsshoofe höhere Chloresterinwerte hömm. Sowieso erstaunlich, woss heut alles getest würrd unn wie empfindlich die Testerei wurrn iss. Urin, Blut, Corona-Viren, Alkohol – alles würrd nauf unn noo getest. Apropos Alkohol unn zughörige Tests. Doo hobb ich neulich a alte Gschicht ghört, die iss so unglaublich, däss ich se euch eefoch verzehl muss! S woor in die 1980er Johrn, wie’s in Grösseneuscht (Großeibstadt) oo die Bundesströss, wo heut noch der Vinzenz mit sei Pizzeria iss, hinne im Hof a Disco geewe hodd. „Captain Hook“. Unn domols gaabs berüchtigde Motorrood-Clubs, Rocker, die ganz schöö aufgezünnd hömm. Wie oo jene Oowerts oo die Disco, als es a Haawerei gaawe hodd unn die Bolizei geruffd wurrn iss. Zwee junge Bolizissde senn komme unn wollte aufklär. Wollte. Die Rocker hömm nämlich von Audi 80, mit dem die junge Bolizissde komme worrn, frech unn ungeniert s Blaulich roo gschraubt (ging bein Audi 80 noch) unn doss hoheitsrechtlich Utensil frech mit Asbach-Cola gföllt. Unn sellwer leer getrunke? Nee, schlimmer! Die zwee orme, junge Bolizisdlich senn in die Medd vo n Kreis genomme wurrn, musste ihr eeches Blaulicht mit Asbach-Cola leer sauf unn dann – besoffe! – zurügg in die Dienststell nooch Könnshofe fohr. Ob die Gschicht stimmt? Ich wääses nedd. Falls doch, unn die zwee Bolizisde – sicher scho pensioniert – lese dess: meld euch bei die Main-Post unn erzählt. Vertraulichkeit garantiert. S bassierd also nix. Owwer n Asbach-Cola, den trink ich mit euch! Nedd aus a Blaulicht. Nee, wie sichs ghört aus ganz normale, glenne Gläslich. Versproche! Servus, der Eustach.