Bad Königshofen, odder Könnshoofe, wie mir sooche, iss wallich a intressants Städtle. Unn ömmer extrem! Nedd selden s Johr üüwer der droggensd Ort weit unn breit unn n Winter oft aa der kältst! Unn in unnern Landkreis die enzich Stodt mit n leibhaftige Nochtwächter! Bis jetzt. 34 Johr lang hodds der Richard Lhotsky aus Draa (Aub) gemocht unn jetzt söll Schluss sei. Worömm? Weil er sich geärgert hodd. Sei Arbeitgeber, die Stodt, wollt n Mai 2021 s „Europäische Nachtwächter- und Türmertreffen“ ausricht. Wär weeche Corona wohl eh nedd gange, owwer dodrömm gädds nedd. S gädd ömms Brinzib. 200 Teilnehmer wollte komm, owwer die Stodt hodds nedd gschaffd, genug Übernochtungsmööchlichkeide für die ville Nochtwächter unn Türmer zu finne. Reihenweis hodds Absagen vo die Hotels unn Bensione ghagelt. Wunnert mich nedd. Bei die Türmer könnt ichs jo noch versteh, ower Übernochtung für n Nochtwächter??? Der iss doch eh die ganz Nocht off die Ärwert unn dann flaggt er wohrscheinlich hundsmüd vo sein oostrengende Dienst n ganze Dooch ins Bett römm. Organisatorisch a Herausforderung für die Hotels unn so hömmse oogsochd. Der Richard hodds aus s Mitteilungsblatt vo sei Zunft erfohrn unn doss hodd ihn so geärgert, däss er jetzt sein Dienst quittier well. Der Bürchermässder vo KÖN wor zerknirscht unn hodd gsocht, däss er n Richard nedd ereich kannd. Dann wollt er ihm schreib, owwer der Brief iss versehentlich oo n Moo mit gleiche Noome gange. Domm gelaffe unn so städd Könshoofe demnächst ohne Nochtwächter doo. Die Gauner, Eibrecher unn Räuber werrn sich scho die Händ reiwe! Broblemme üüwer Brobleeme. Weil: die Brunnenfrauen, die seit 2003 n Vierröhrenbrönn medde offn Morrdblatz mit 3.000 Äär gschmückt hömm, hörrn aach auf unn hömm den schönne Brauch oo die Stodt üüwerdrooche. Unn jetzt? A uuseliche Entwigglung! Bräuch werrn mir nix dir nix oo die Städt unn Kommunue üüwerdrooche! Wo söll doss end??? Müsse die Städt demnächst ihr Beamte unn Oogstellde dofür abstell, als Dreikönig durch die Gasse zu ziehn unn a boor Woche später zu klappern? Korfreidich, ihr wösst scho. Unn vurher der Fasching? Der Bürchermessder als Sitzungspräsident unn der Stodt-/Gemeinderood als Elferrat? Unn in Herwest no als schneidige Kirmesbursche? Oh je, oh je! Traditione bein Deifel? Sidd ganz denooch aus. Servus, der Eustach.