S gidd wohrscheinlich nedd wenig Leut, die denke, däss es unner Haustiere zu Corona-Zeite besser gedd wie uns Mensche. Könnt mer gemeen. Die Katz licht wie ömmer faul neewe n Oofe, grichd vo Corona unn doss ganz Drama nix mit, unn die Hönnd fränn sich, däss ihr Frauchen unn Herrchen weeche Homeoffice so vill dehemm senn unn sich so jede Menge Zeit fürs Gassigänn nehm könne. Owwer woos für Honnd unn Katz grundsätzlich gilt, stimmt sicher nedd für dübbische Nutztiere wie zum Beispiel Hünner odder Mellichküh. Die werrn jo oft verniedlicht unn verklärt unn wenn mer Hünner in Freilandhaltung odder Mellichküh in ihr Riesen-Wohlfühlställ sidd, könnt mer offn erschte Bligg aa wallich gemeen, däss es derre richtig gut gädd. Weit gefehlt, sooch ich euch. Der absolut Leistungsdruck, wie er bei uns Mensche in die Fabrigge unn oo die Arbeitspätz herrscht, gilt scho seit langer Zeit ganz genauso aa für Küh unn Hünner. Vill Leut denke jo ömmer noch, däss Hünner Ähr leeche, däss mir woss zu Esse hömm. Ha, ha! S Huh leecht, weil sichs vermehr well! Unn weil mer die Hünner so gezücht hodd! Noch vill komplizierter isses bei die Mellichküh. Vill wösses vielleicht, owwer ich hobb mich jetzt noch amol nöher mit befasst, weils mich ganz eefoch interssiert hodd. Also: a Kuh gidd zum erschte mol Mellich, wenn se ihr erschts Kälble geburrn hodd. Doss Kälble würrd owwer gleich nooch die Geburt gnadenlos vo ihr Mutter getrennt unn künnt in die Kälberaufzucht, wo’s meistens Ersatznahrung gricht. Die Mellich vo die Kuh, ächentlich fürs Kälble bestimmt, muss jo verkäfft wer. Für zortbesaite Leut iss die Trennung a herzzerreißende Sach, weil Mutterkuh unn Kälble nochweislich unheimlich leide unn richtig Trennungsschmerz hömm. Vier bis sechs Woche nooch die Geburt gidd die Kuh Mellich wie blöd, dann würrds weniger. Die Kuh würrd dann gleich widder (natürlich künstlich) besamt. Sie stillt also noch (s Kälble nennt sich Melkmaschine!), iss owwer aa scho widder schwanger. Ich koo merr nedd ghölf, owwer ich mach mir do scho mei Gedanke. Tiere hömm schließlich aa ihr Gfühle. Gläbbt ihr nedd? Beispiel: S Vogelweible setzt untröstlich off n Ast unn iss in Träne aufgelöst. Er, der Vogelmoo, neewe droo, wääs nedd, woos er mach söll unn seechd no: “Gläb mersch. Der blöd Ring iss vo die Vogelwarte. Ich bin nedd verheiert!!!“ Servus, der Eustach.