Neulich woor in die Zeitung zu lese: „Jaguar baut ab 2025 nur noch E-Autos“. Unn der Markus Söder hodd jo aach scho vuur längerer Zeit verlaut läss, däss er s Johr 2035 als End von Verbrennungsmotor für a guude Idee hält. Domit iss aus meiner Sicht gloor: die Dooch vo die Auto, mit denne mir aufgewochse senn, senn unwiderruflich gezählt. Jetzt well ich goor nedd üüwer Sinn unn Zweck vo die Entwicklung diskutier – a grösse Bortion Wehmut iss owwer dabei! Für die junge Leut vo heut gädds jo scho lang nix merr drömm, woss für a Auto sie hömm – Hauptsach sie hömm ees. Kultauto gidds heutzudooch ehrer bei die Mädlich: Fiat 500 Cabrio, Mini, Ford Ka, Opel Adam. Früher? Do hadd kee Mädla a Auto ghood. Mir wollte se nochts jo hemm fohr! Unn mit woos? Mit unner Kult-Autos! Du hossd domols nur woss gezählt, wenn du ees vo die folgende Körrner hassd: Ford Capri, Manta A odder B (GT/E!), BMW 2002tii, Opel Ascona, 190er Mercedes, Opel GT, Golf GTI, Opel Kadett C Coupé, 3er BMW. Unn ganz wichtig: vurrn off die Stoßstange am beste gleich vier aufmontierte Hella-Zusatzscheinwerfer. Legendär! Ich konn mich noch gut entsinn, wie ich 1976 n erschte Golf GTI offn Parkplatz gsenn hobb: 110 PS bei leer 810 kg, rot. Wenn du doo vorrn im Kühlergrill s Blassdigschild mit die drei Buchstoowe „GTI“ gelese hossd, hodd dei Herz höcher gschlooche unn s wor gloor: doss iss er! Wenn mer sich dann owerts offn Durfblatz gedroffe hodd, ömm zum Tanz in Grösseweechm, Obereßfeld, Schneggeegg-Rothhause, Ebehause odder Unterpreppich zu fohrrn, senn die Boliden aufgfohrrn unn gegeseitig bewunnerd worrn. Spoiler hinne, Spoiler vurrn, Rallye-Streff, unn bei die Manta obligatorisch: der Fuchsschwaanz oo die Antenne. Schöö, owwer irchendwie aach a riesiger Leistungsdrugg, weil du wollst jo mithalt, wenn die verschiedene Marken aufgfohrrn senn. Worömm doss so woor unn woos der Grund für die Geilheit off s best unn schönst Auto wor? Frääch mich nedd. Owwer schöö woorsch! Dess woor aa die Zeit, wo bei a Formel I-Rennen im Fernsehen der Sound noch so geil woor, däss die Aussteuer im Wohnzimmerschraank s Klappern oogfange hodd. Wie 1989 die Grenz aufgange iss, hodd mer als Wessi erscht amoll gmerkt, wie leichts die Kerl im Osten hadde. Do woor die Frooch nur: hossde a Auto, odder hossde kees. Aa nedd schlecht. Servus, der Eustach.