Ächendlich werrn mer jetzt meddedin. Wo? In n Fasching natürlich! N vergangene Sonndich wär die Maskenfastnacht in Öwerelsbich gewasst, monche Faschingsvereine wärrn mit ihr Sitzunge scho fertig, annere hädde grod erscht oogfange unn widder annere hädde noch alles vuur sich. N kommede Freidich wär „Fastnacht in Franken“ aus Veitshöchheim. Iss jo aa, ower halt nedd richtig. Nur als Aufzeichnung. Ohne Bubbligum, ohne Stimmung, ohne Verkleidung. Maske würrd mer trotzdem vill senn, owwer senn halt nur die ganz komische. FFB2 odder so ähnlich. Ja, schwerre Zeiten für die Norre. Trotzdem lässe sich vill rührige Vereine nedd onndergriech unn biete Fasching ins Indernedd oo. „Online-Fasching“, „Cyberfasching“ odder „Foosenochd 4.0“ hässd doss jetzt. Die Akteure drehn lustige Videos mit Büttenreden unn Skedsche, schneides elegdronisch zomm unn stelles no neis Internet. Üwer n Link, der dich zum Beispiel off YouTube führt, konnsdes oogegugg, wenn ömmer du wisst. Vill werrn sooche, solche moderne Pfürz, doss iss doss nix, blei mer wagg unn hör mer auf! Macht langsam, so schlecht iss doss vielleicht goor nedd. Ich well euch amoll a boor Vorzüüch aufzähl. Du konnst dehemm geblei, unn dir den Fasching in dei Durf ganz bequem vo dein Fernsehsessel aus oogegugg. Musst dich nedd mühselig verkleid, unn wer bei die Sitzung neewe dir setzt, wessde aa scho: dei Hulda, mit der do scho johrelang verheiert bist. Wenn du nedd wissd, musste nedd mitschunkel, s Bier iss billig (n Kossde Oettinger gidds scho für onnder 10 Euro!), Eintritt kossds aa kenn, unn wenn dich innerlich a Wind dröggd, lässdn naus. Der Kloo iss bloß a boor Schritt entfernt unn wenn du dir denooch die Händ nedd wöscht, guggt dich keener blöd oo. Wenn du n Witz nedd versdanne hossd, spulst de zurügg unn hörschd n oo, bis du‘n kapiert hossd. Doss iss wie die Zeitlupe bei‘n Fußball! Wenns langweilig ist, hältsde oo, schlöffsd a halbs Stönnle unn guggst no weiter. Oos Hemmgehn brauchste nedd zu denke unn die Promillegrenz konn dir aa gstohle blei. Alles gut also. Unn die Norre brauche sich aa kee Zukunftssorche zu mache. Jetzt sölle die Erzieherinne in die Kitas aach alle Maske aufsetz. Soviel Maske wie die Kinner vo heut in drei Woche, hömm mir süsst in fönnef Johr nedd gsenn! Wenn doss nedd alles Fosenöchter unn Norre werrn, no wääs ich aa nedd! HELAU und Servus, der Eustach.