FREDI BREUNIG

Fredis Glosse

Jeder Bobel föhrt n Opel

08.12.2020

Es hodd amoll a Zeit gaawe, do woor die Welt aach im Sport noch eefoch, übersichtlich unn ungfähr so: die meiste, „gemeene“ Leut - zumindest bei die Männer - hömm Fußball spielt, der Rest Dennis odder Golf. Dann senn der Boris Becker unn die Steffi Graf komme unn Dennis iss innerhalb vo kürzester Zeit Volkssport wurrn. Unn die Reiche hömm sich of Golf zurügg müss ziech. Unn heut? Der Dennis-Boom iss scho lang römm unn Golf iss s letzte Refugium von die finanziell bessergstellte. Musst nur of die Barkblätz bei die Golfblätz in Kissinge odder Bildhause fohr unn dir die Auto oogugg. Vill BMW, Daimler, Porsche unn Audi, wenig Opel, Fiat unn Asiaten. Die stenn oo die Sportblätz. Owwer apropos Porsche. Hobb ich neulich woss ganz Intressants geleese: die meiste Porsches in Deutschland gidds nedd wie mer denkt in München oder Stuttgart, naa, in Wüstensachsen in die Rhöö! Do wohne rund 1.200 Leut unn jeder 42. hodd n Porsche! Es iss owwer nedd ee enzichs Auto dabei, sondern lauter Bulldog! 28 Porsche-Bulldogg in ee Durf. Keine Chance für Cormick, Fendt, Deutz, Eicher, Hanomag odder goor Lanz. Doo iss Neid so gut wie ausgschlosse unn doo hodds wohrscheinlich amoll n ganz rührige unn raffinierte Händler odder Vetreter für Porsche-Bulldog gaawe. Ja, ja, doss Golfspiele. Woss vill nedd wösse: goor nedd so ungfährlich! Die horrde Böll werrn üwer Riesen-Distanzen gschlooche, flieche nedd ömmer do hie, wo se sölle unn treffe nedd selten annere Spieler offn Kopf. Der Donald Trump spielt jo aa oft Golf unn wenn mich nedd alles täuscht, iss der aa scho amoll getroffe wurrn. Denk ich jedenfalls. N schönne Witz üwer Golf hobb ich gfonne. Jesus unn Gott spiele zomm Golf. Als erschtes schlööd Jesus. Der Bool fliegt 300 Meter durch die Luft und direkt neis Loch. Jetzt ist der Herrgott droo. Der Bool fliegt 300 Meter durch die Luft und direkt offs Loch zu. Da künnd a Maus unn schnabbd sich den Bool. Aus n Strauch künnd a Katz unn baggd sich die Maus und den Bool. Vonn Himmel künnd a Adler, gralld sich die Katz mit die Maus mit den Bool unn fliegt devoo. A Blitz künnd aus a Wolke und treffd den Adler, der Adler lässt die Katz los, die Katz lässt die Maus los, die Maus lässt den Bool los unn der Bool rollt direkt nei‘s Looch. Guggt der Jesus sein Vodder oo und seechd: "Sooch amol, Papa! Blödeln mer jetzt römm odder spiele mer Golf?!" Servus, der Eustach.


<< zurück