FREDI BREUNIG

Fredis Glosse

Vorurteile - nix als Vorurteile! (Mundart)

18.08.2020
Vorurteil odder Tatsach? Doss is jo oft die Frooch, wenns ömm die Beurteilung vo Zeuch gedd, doss uns tagtäglich begeechend. Es iss jo wallich so, däss mer Leut, die irchendwoss annersch mache wie mer selber, nedd selten mit a Vorurteil obbstömmbeld unn nei a gewisse Eck stellt. „Leut, die Schoklad mit Chili mööche, leide onnder Gschmacksverirrung!“ sooche vill. Dübbisches Vorurteil. Ich verstehs zwoor aa nedd, wie een Schoklad mit Chili gschmegg konn (entweder ich will süß odder schorf ess), owwer wenn doss derre Leut schmeggt – worömm denn nedd? Leben und leben lassen. Beispiel Nummer zwei: „Boliddiger senn doch alles Gauner!“ A schwerwiegender Vorwurf. S gidd halt leider ömmer widder Fäll, die doss Vorurteil stütze unn schürrn. Erscht neulich: die Berliner Senatorin für Stadtentwicklung und Wohnen, Katrin Lompscher (Linke), hodd erscht übersenn, däss sie Aufsichtsratsvergütunge für ihr Bössdle in landeseigene Unternehmen nedd wie vuurgschriewe oo die Landeskass zurückgebe hodd. Dann hodd se gemerkt, däss se vergesse hadd, die Einnohme zu versteuern. Domm gelaffe. Rücktritt - Schluss, aus, fertich! A weit verbreits Vorurteil iss aa, däss die Leut zunehmend berechnend werrn unn nur off ihrn Vuurdeel aus senn. A doo gidds etliche Beispiele, die die Vermutung stütze, däss doss gor kee Vorurteil iss, sondern stimmt. Du dreffsd Bekannte, erzählst, däss du neulich rein zufällig ganz bei ihne in die Näh worrschd unn hörrschd: „No wärt ihr doch amol vorbei komme!!“ Gloor! Könne die leicht gsooch, weil es iss jo scho römm. Hässde vurher gfräächd, hädde die Spezialiste wohrscheinlich gsochd, dässe nedd doo senn. N schönne Witz, der vuur Vorurteile ner bloß so strotzt, well ich euch nedd vuurendhald. Die Wissenschaft streit sich angeblich ömmer noch drüü, woss für a Landsmann die berühmt Gletschermumie Ötzi denn woor. Dässes a Österreicher woor, schließt die Wissenschaft mittlerweil sicher aus, weil mer bein Ötzi Hirn gfonne hodd. A Italiener konns aach nedd gewassd sei, denn schließlich hadd unner Freund ausm Ötztal Werkzeug dabei. N Schweizer, bekanntlich nedd der Schnellst, hodd mer lang für mööchlich ghalde, denn der Ötzi iss sogoor vo en Gletscher üüwerhold wurrn. Am End dürft owwer ziemlich sicher sei, däss der Ötzi a Deutscher woor. Worömm? Ganz gloor: wer süssd gedd scho mit Sandale nei’s Gebirg??? Servus, der Eustach.

<< zurück