In Zeite wie jetzt stehn vill Leut im Mittelpunkt, die’s nedd gewöhnt senn. Sie mache ihr Ärwerd ehrer unspektakulär im Hinnergrund. Krankeschwester, Altepfleger, Supermarktkassiererinne, Erzieherinne, Rettungskräft und und und. Nur zu wichtig, däss endlich amol gewürdigt würrd, woss die düchdiche Leut in die Krise jeden Dooch leiste! Gleichzeitig müsse mer owwer aufbass, däss mer nedd die Leut vergesse, die vo Corona so richtig gebeudeld werrn unn vo derre mer doss üwerhaupt nedd vermut. Landrät zum Beispiel. Stellt euch amol vuur, wie sich s Laabe vo n dübbische Landrood durch Covid-19 verändert hodd. Der Habermanns Dommas zum Beispiel. Seit 2003 im Amt unn just mit Beginn der Krise zum vierte unn letzte moll zunn Häuptling vo Rhön-Grabfeld gewählt wurrn. Hodd jedes Wochenend vorsichtig gschätzt 15 Dermine vom Feuerwehrfest üwers Vereinsjubiläun bis zum Bieranstich bei irchend n Hoosekühlesverein und müsst so jedes Johr off mehr wie 500 Dermine alle oo Wochenende komm! Unn seit Corona? Nix! Nullkommanull! Pfeuffedeggl! Kee Boliddiger-Derbläggn in Burglauer, kee Festkommers, kee Weideabtrieb in Ginolfs, nix! Er mit sei Erfahrung würrds wegstegge. Owwer stellt euch amoll vüür, Corona wär komme, wie a noochelneuer Landrood gewählt wurrn wär, der sich scho drauf gfrääd hätt, jedes Wochenend in a Bierzelt, a Sportheim odder a Feuerwehrhaus sehnlichst erworrd zu werrn, a kurze Red zu halte unn dann zu Esses unn Drinkes eigeloode zu werrn. Hundsfotze! Nix! Der hädd nooch ocht Woche sein Rücktritt eigereicht, weil er gsocht hädd: „Soo hadd ich mir doss nedd vuurgstellt.“ Ja, nedd eefoch. Sicher aa nedd fürn Habermanns Dommas. So viel wie heuer hodd mer den noch nie in n Getränkemarkt gsenn. Trink muss er jo trotzdem woss, aach wenns dehemm iss. Jeden Freidich, jeden Samsdich, jeden Sonndich dehemm. Do muss mer sich nooch 17 Johr Vollgas sicher aach erscht amol droo gewöhn! Unn so bleiwe mir ratlos zurück unn zermarten uns s Hirn üwer die Frooch: gfällts n Landrood besser, wie’s jetzt iss odder wie’s vuur Corona woor??? Zum Schluss a Gedicht: "Das Wochenende öd und leer, auch sein Chaffeur schaut blöd daher. Da lässt der Landrat einen krachen und alle fangen an zu lachen. Er war zur Jagd und schoss daneben, das Wildschwein grinst – es bleibt am Leben." Servus, der Eustach.