FREDI BREUNIG

Fredis Glosse

Nur noch a Nummer (Mundart)

17.03.2020
So, gewählt iss endlich unn ich hoff, däss alle Blätz oo die verschiedene Roodsdisch mit richtige Fachleut besetzt wurrn senn. Wobei ich zu monche Fachleut a gspaltens Verhältnis hobb. Mir fällt ömmer widder auf, däss solche Spezialiste, die sich in ihr Fachgebiet sicher gut auskenne, doss aa gern raushäng lässe. Gut zu beobachde, wenn zum Beispiel a Ärztin odder a Oorzt odder so in a Talkshow setzt. Neulich erscht widder bei Anne Will. Es güüng ömm Corona (woos süssd?) unn vo a elegant Virologin hodd mer ghört: „Das betrifft hauptsächlich Patienten mit respiratorischen Erkrankungen.“ „Was heißt das?“ hodd die Anne Will gleich gfräächd, worauf sich die Fachfrau beeilt hodd, mit a vuurgschoowes „Ach so!“ zu erklärn, dässes doo ömm „Erkrankungen der Atemwege“ gedd. Doss deutlich verächtlich ausgsproche „Ach so“ sollt so viel häss wie: „Ach ja, do dause vuur die Fernseh hogge jo lauter Dolle, die nedd wösse, woss respiratorisch iss.“ Jetzt wösse mersch! Leut, die sich off a bestimmts Gebiet auskenne, brenges oft eefoch nedd fertig, sich soo auszudrögge, dässes aach Leut kapiern, die eewe nedd vom Fach senn. Jedesmoll ärcher ich mich, wenn ich zum Beispiel inn Bolizeibericht in die Zeitung laas, däss s n Wildunfall „auf der Staatsstraße 2445“ geebe hodd. Woher söll ich denn wöss, wo die „Staatsstraße 2445“ iss?! Bei die A 71 odder die B 279 läss ich mirsch noch eigeh, die kennt jeder, ower die „Staatsstraße 2445“, die „NES 13“ odder die „NES 46“? Keine Ahnung! Söll ich erscht neis Internet unn süch? Worömm schreibt mer doo nedd eefoch „auf der Straße zwischen Mittelstreu und Unsleben“ odder „zwischen Obereßfeld und Sternberg“??? Soo eefoch! Oweer zunehmend bestädd die Welt bloß noch aus Zohle unn Nummern unn irchendwie konn mer aach doss scho als Digitalisierung bezeichen. Wenn du zum Esse nei a Pizzeria odder zunn Grieche gässd, stänn in die Speisekorrde ömmer die Nummern vuur die Gerichte unn vill bestelle nur noch mit die Zohle. Bei komplizierte Noome wie „Arnaki kleftiko“, „Skordalia“ odder „Kotopoulo lemonato me patates“ läss ich mir doss jo noch eigeh. Ower wie ich neulich oon Nochberdiisch ghört hobb, wie jemand „Erschd die 15, dann die 43 mit der 7 und zu Trinken ne kleine 24“ bestellt hodd, hobb ich scho bei mir gedocht, wie eefoch unn doch kompliziert unner Welt mittlerweil wurrn iss. Servus, der Eustach.

<< zurück