So, nu hömmersch. Fastenzeit! Endlich, werrn vill sooche, die mit Fasching nix am Hut hömm unn am End genervt worrn, weil nix merr annersch in die Zeitung gstanne wor als Fasching. Blöd, sooche die, die jetzt fast müsse. S gidds dadsächlich ömmer mehr (hauptsächlich) Männer, die jetzt sechs Woche lang keen Alkohol drinke. „Unn, wie geddersch dabei?“ „Och, nedd schlacht. S alkoholfrei Bier schmeckt jo mittlerweil genauso gut, wie doss mit Stoff.“ „Scho“, werrn jetzt vill eiwände, „owwer ich sauf doch Bier nedd weeche n Gschmoog.“ Weeche woos denn? Dja, der glee Summserer, den mer gricht, wenn mer ees, zwee odder drei Bier hodd, iss halt doch woss schöns. A richtiger Rausch musses goornedd sei, s muss nur a weng gribbel. Ihr wösst scho, woss ich meen. Unn Witz werrn widder gemocht. „Mach mit! Kein Alkohol am 30. und 31.02.2020!“ Doo hömm spontan aach vill Quartalssäufer gsocht, dässe mitmache. Ja, zum Dääl konn mer halt bloß noch gsauf, ömm die Welt auszuhalte. Vielleicht hölft a glenne Dosis Alkohol ja aa geeche doss Deifels Corona-Virus! Doss iss ja aa so a Werk! In China hömm se in 10 Dooch a noochelneus Krankehaus aussn Boode gstampft. In Könshoofe brauche se drei Johr, ömm ees oozureiße! In 10 Dooch a Krankehaus bau! Unglaublich!!! Wie hodd neulich a Zeitungsmensch in n Kommentar gschriewe: in Deutschland bräucht mer die 10 Dooch allee, ömm n Leitz-Ordner mit dem Wurrd „Planfeststellungsverfahren“ zu beschrifte. Stimmt! Mir senn scho irchendwie a komisch Volk. Monichmol stellt mer sich vuur, woss wohl a Außerirdischer denk würrd, wenn er zu uns off die Erde komm unn uns beobacht dääd. Wenn der Marsmensch zum Beispiel seh dääd, wie zwee Lebewesen (a Moo mit sein glenne Hund) mitenanner spoziern gehn, unn der grösser vo derre zwee (der Moo) dräächd n Glennere (n Hond) sei Scheißhäufle in a Blassdiggdüddle hinnerher: wer denkt der wohl, däss der Chef vo derre zwee iss??? Alles relativ. Wie so vill! Aach in die folchend Gschicht. A reicher Arzt unn a türkischer Mitbürger keffe sich zomm a Doppelhaushälft. „Meine Hälfte ist mehr wert als deine!“ seechd der Türk. Doodrauf hie der Orzt: „Quatsch! Unsere beiden Hälften sind völlig gleich. Warum soll deine Hälfte also mehr wert sein als meine?“ „Ganz einfach!“ sagt der türkische Mitbesitzer. „Ich wohn‘ neben Arzt, aber du wohnst neben Türke!“ Servus, der Eustach.