Ich hadd jo neulich scho amoll gschriewe, däss ich entweder B5 aktuell odder Bayern 1 hör. Intressant bei Bayern 1 woor in die vergangene boor Woche die Serie „Das gibt’s doch gar nicht – oder etwa doch?“ Der Marcus Fahn hodd doss jeden früh gemochd unn doss wor wallich intressant. Es iss zum Beispiel gfräächt wurrn, ob eener a Auto hodd, doss scho a Million km offn Dacho hodd, ob jemand scho amol mehr wie 100 kg obgenomme hodd odder ob a Fußballmannschoft scho mo mehr wie 250 Gegentore in ee Saison gricht hodd. Alles hodds tatsächlich scho gaawe. Dann isses drömm gange, ob a Fraa scho mo Mutter un Oma oo een Dooch wurrn iss (gab’s aach!) und obs n Dädowierer gidd, der selwer nedd dädowiert iss. Ach doss hodds gaawe. Indressand. Genauso gud hädd merr frääch könn, obs n Metzger gidd, der kee Wurscht isst odder n Bägg, der kee Hürrnlich, Brot odder Bröödlich mooch. Hädd mer sicher aach gfonne. Ich hädd ach so a Frooch. Gidds in Bayern a Gebäude, doss auße schneeweiß, riesengroß, inne ower komplett leer iss? Ich hobb do so en Verdacht. Kunert, Neuscht, Hochregallager. Auße weiß, riesengroß. Owwer iss aach woss dinn? Ich hobb mei Zweifel. Wie ich neulich in die Rhöö widder mo of mei Lieblingsstreck vo die Schornhecke zu die Thüringer Hütte gewandert bin, iss mir aufgfalle, däss tief unnde im Tal Neuscht jetzt ganz leicht zu finne iss. Der weiß Kossde vonn Kunert iss braggdisch ömmer zu senn! Mei Dheorie: in den weiße Kossde iss wallich nix dinn! Er iss nerr bloß dasswaache so groß unn schneeweiß, däss mer selbst von dreißig Kilometer Entfernung wääs, wo Neuscht lichd! Unn bezohlt hodd alles die Stodt! Der Kunert hodd domit gor nix zu dunn, doss Ding iss leer, stedd nur offn Kunert sei Firmengrundstück unn iss die größt‘ Werbemaßnahme, die sich unner Hauptstodt in die letzte boor Johr geleist hodd!!! Zum Schluss noch amol zu a Auto mit a Million km offn Dacho. Der Gotthold hadd ees mit 250.000 unn wollts verkäff. Ich hobb ihn geroode, zu n mir bekannte Automechaniker zu genn, der ihn den km-Stand unter die Hand off 50.000 zurückdreht. Worr früher schließlich gang unn gäbe! Wie ich ihn neulich widder getroffe hobb, hodd sich der Gotthold für den Dibb bedankt. „Hossdes gemocht unn s Auto verkäfft?“ hobb ich gfreechd. Seecht er: „Ich bin doch nedd blöd! Verkäff doch nedd a Auto mit 50.000 km offn Dacho!!!“ Servus, der Eustach.