Mer mecht sich monnichmol Gedanke über Zeuch, wo mer sich selwer freechd, ob mer noch ganz sauber iss. Wie ich neulich n Bericht üüwer n Wolf geleese hob, der jetzt widder bei uns Fuß fasst, unn ob er gschosse wer söll odder nedd, hob ich mich dro erinnert, wie der Wolf zum Beispiel in die Märchen bekämpft wurrn iss. Unn ich hob mich allen Ernstes gfräächd, ob mer n Wolf nooch s obligatorisch Bauchaufschneides nur bei die sieben Geißlein Stee nein Bauch hodd, odder ob doss beis Rotkäppchen aa so wor. Zeifelesfrei rauszugrieche woorsch nedd. Unn so mecht mer sich ständig Gedanke üwer Dinge, die een ächendlich wurschtegal gsei könnte. Ömm doss nöher zu erklärn, muss ich a weng aushol. Ich wor amol in a Durf in die Haßberg, weil ich do woss obhol wollt unn nei n Kofferraum voss Auto eiloodt wollt. Die Heckklappe vos Auto wor off, ich hob eigelodde unn mich ins Haus noch kurz middn Verkäufer onnderhalde. Geh naus, klapp zu unn fohr fuchzich Kilometer hemm. Wie ich ookomme bin, hobb ich n Kofferaum aufgemocht unn woss springt raus? A Katz! Hatt‘ sich in ihrn Heimatort bei mir nei’s Auto gsetzt und iss mit mir hemmgfohrn. Ville Leut hätte jetzt gsocht, lässe renn, s iss jo bloß a Katz. Owwer ich als empfindsamer unn feinfühliger Mensch hobb mir sofort Gedanke dodrü gemocht, woss die orm Katz mit Migrationshintergrund jetzt wohl fühlt. Hodd se Hemmkrankert? Gfällts ihr bei uns in die Rhöö? Merkt se üüwerhaupt, däss die Luft off emol a weng frischer iss wie dehemm unn die Leut a weng annersch reede? Unn mer könnt doss Dehma jo weiter gspinn. Fühlt unn verhält sich a bestimmter Vogel, sooche mer amol, a Spootz, in Köln odder Berlin annersch wie in Schmoolwasser odder Ottelmannshause? Überdräächd sich also der Charakter unn s Verhalte vo die Mensche in n bestimmte Landstrich of die Tierwelt? Wenn doss so wär, müssd zum Beispiel a Taube, bekanntlich a ehrer ruhiger Vertreter onnder die ville Vööchel, in Köln deutlich gschwätziger sei wie a Rhöner Spootz. Odder verhält sich a Floodunger Babbagei dübbisch fränkisch, wenn ihn wos auffällt unn er seecht „Mir gugge erscht amol“, während a Babbagei in Düsseldorf sofort losblabbert unn vur lauter Reedes n halbe Liter Wasser sauf muss? Frooche üüwer Frooche! Wie aa die: „Woröm stinke Fisch so orch, obwohl se ihr ganz Laawe lang boode?“. Ich wääses nedd. Servus, der Eustach.