S gidd jo ömmer gscheite Leut, die uns sooch welle, wie mir zu leebe hömm unn woss mir mach sölle, däss unner Laawe leicht unn eefoch iss. Jetzt, in Zeiten vo Kommunion unn Konfirmation iss garantiert widder hunnerdfoch in die Glückwunschkorrde der berühmt Spruch von Mark Twain „Gib jedem Tag die Chance, der schönste in deinem Leben zu werden.“ gschriewe wurrn. Der hodd leicht reede, der Herr Twain. Owwer woss well denn a Dooch mach, wenn du a Darmspiegelung hossd, es in Strömen reent unds owerts Erbessuppe zu esse gidd?! So a Dooch hodd doch scho verlurrn, wenn du bein Doggder den Termin für die Darmspiegelung ausmechst odder die Fraa sich für die Erbessuppe entscheid! Lauter guude Roodschläg. Zum Beispiel vo Leut wie n Pater Anselm Grün vo Münsterschwarzach. Wenn mer den in die Zeitung sidd odder amol off een vo sei Vuurdrääch iss, denkt mer jo, däss den nix öömgschmeiß konn unn dess der sich nie üüwer woss aufreechd, aach wenn’s noch so ärgerlich iss! „Positiv denken“ würrd uns do ömmer geroode. Odder wie die Engländer sooche: „Pink thositiv“. Odder so ähnlich. Tja, leichter gsocht wie gemocht! Mich dääd amol intressier, woss zum Beispiel der Pater Anselm mecht, wenn er wie ich neulich widder amol a Bild aufhäng well unn n Noochel nei die Waand schloo muss. Ich hobb ausghoold, nedd getroffe unn mir middn Hommer voll off n Finger ghabe. Unn sakramentiert, desses a Pracht wor. Döff der Anselm Grün jo scho nedd. Owwer wenn der sich middn grösse Hommer offn Finger klopft, denkt der sich no middn Blick nooch oowe: „Danke Herr, dass du mir diese Erfahrung schenkst.“? Odder frääd er sich üüwer die schönne Forbe vo sein Finger in die kommende boor Dooch? Möchlich. Mach ich jetzt aach. Ich hobb mich zum Beispiel ömmer aufgereecht, wenn ich midds Auto nur a boor hunnert Meter gfohrn bin, zu faul zum Ooschnalle wor, unn der Gurtwarner wie blöd vuur sich hie geplärrt hodd. Heut hör ich mir die Melodie vo dann Warner oo unn überleech als alter Musikant, woss für Tön doss senn. Ihr gläbbd goorned, wie doss entspannt! Und desweeche rood ich jeden, der sich Dooch für Dooch üwer s verschiedenst Zeuch ärgert: positiv denken! Reecht euch nixmer auf, bleit ruhig unn seht alles vo a annere Seite als bis jetzt. Soo wie’s der folchend Spruch rödd: „Ärgere dich nicht, wenn dir ein Vogel auf den Kopf macht, sondern freue dich, dass Kühe nicht fliegen können.“ Servus, der Eustach.