Meldunge gidds in die letzt Zeit, die hädd mer noch vor ees, zwee Johr eefoch nedd für möchlich g‘halte. S Kloster Kreuzberg söll vielleicht zu mach unn in die Neuscht sölls ball kee Fußballmannschoft mer geb. Nedd mitenanner zu vergleiche unn trotzdem nedd vurstellbor. Bei die Fußballer in unner Hauptstodt drohe die Lichter auszugenn. Erschd vuur a boor Johr hodd der ruhmreich VfL mit die Sportfreunde fusioniert unn jetzt söll nedd emoll doss nixmer lang, jeden Sonndich wenigstens ee Fußballmannschoffd zomm zu brenge? A neue Spielgemeinschoffd zu bilde, iss jo in gewisser Weis wie früher die Brautschau: wenn du zu lang worrdst unn zu spät midds Süche oofengst, senn alle Bräut vergaawe unn du guggst als Bräutigam nei die Röhre. So gedds alleweil die Neuschter. Die Brender hömm oogewunke, weil se scho mit Windshause verheiert senn. Hohenroth unn Herschfeld welle solo blei unn alle annere mööchliche Bräut rund römm (Salz, Mühlbich, Leutschause) senn scho unter die Hauwe. Domm gelaffe! Spielgemeinschoffde, wo du bloß hie guggst! In die Rhön-Grabfelder Provinz scho lang! Für die Sportredaktione bei die Zeitunge a Albtraum. Wie sössdn die Därmel vo Noome mit die Zeit in die Tabelle unn Spielbaarunge onnderbring? Doss würrd jo unmööchlich. Wenn in die B-Klass Rhön 2 Önnerawerschboch/Ööwerawerschboch/Stäänich II geeche Örleboch/Ebenhause odder Eltingshausen/Rottershausen spiele, treibts die Herren Reddagdööre die Schwääsperle heut scho of die Stirn. Noch schlimmer in die B-Klass Gruppe 3: Ginolfs/Weisbach/Unterweissenbrunn/Frankenheim II geeche Heustreu/Hollstadt II/Rödelmaier II. Unn der Albtraum schlechthin in derre Grubbe: die SG Oberelsbach/Oberwaldbehrungen/Unterwaldbehrungen II! Bis du den Noome n 21. Dezember kurz noochs Frühstück ausgsproche hossd, isses daus ball scho widder dunkel! Ins Grabfeld nedd annersch: Trappstadt II/Gabolshausen-Untereßfeld/Alsleben I geeche Sulzfeld/Merkershausen II/Eibstadt II. Verröggd! Langsam döff der Fußballverband oofang, Regione zommzufasse. Unteres Streutal geeche Obere Rhön odder Östliches Grabfeld geeche s Untere Lauertal. Odder so ähnlich. Woss bei Pfarreiengemeinschoffde gedd, muss doch aach bei Fußballer möchlich sei! Die Traumpaarung: TSV Saal – DJK Salz. Es war einmal. Servus, der Eustach.