Ich soochs jo ömmer widder: die Welt iss aus die Fuge geroode! Vill, woss mer heutzudooch in die Zeitung lasst, konn mer eefoch nedd geglääb! Of Hawaii hodd zum Beispiel a Abgeordneter allen Ernstes gfordert, s Rauche vo Zigarette erst ab s 100. Lebensjahr zu erlaube. Verüggd! Ower der Moo hodd racht! Wos müssen die junge Bimpfe mit 96 scho rauch! Unna ach süssd: Leut, die mitenanner verheiert senn, reede mer mit Siri unn Alexa als mit ihrn eechene Bardner. Jeden Owerts vuur die Noochrichde rennt die Almased-Fraa midd ihrn gaale Bikini oon Strand entlang unn mecht die Männer wuschich. N Otto-Kaddalooch unn domit n letzte vo die Versandkaddalooche gidds nix mer, die Lindenstraße würrd eigstellt, oowe n Kreuzberch gidds jetzt Gloosgrüüch unn die Rosamunde Pilcher iss gsturwe. Angeblich überleecht s ZDF, daswaache sein Sendebetrieb komplett eizustelle. Ich soochs jo: die Welt iss aus die Fuge geroode unn s iss nixmer schöö! Unn dann die Blödheit, zum Beispiel vo Sportler wie Langläufer odder Biathlede, die denke, nedd erwöschd zu werrn unn sich dobbe! Blutdobbing! Neulich bei die nordisch Schii-WM in Seefeld in Östreich hömmse erscht widder a boor derwöscht. Of frischer Daad! Der ee hadd die Noodel noch dinn stegge ghood. Die lässe sich a Liter Blut oozapf, wenn se a Höhendrääning gemochd hömm unn dodurch mehr rote Blutkörberlich ins Blut hömm. Dodurch würrd mehr Sauerstoff transpordiert unn sie könne schneller gelaff. Kurz vur n Wettkampf würrd doss Blut widder neigelässe unn ab gedd die Post! Schlimm! Hodd mich ower off a Idee gebrochd. Oft künnt mer jo in a Gsellschoffd nei, wo alle schon stockvoll besoffe senn. Iss für nüchterne Leut schlimm, weil die denke, däss alle annere spinne. Du möchst aa mitgemach, brauchst of normale Weg oweer zu lang, ömm genauso besoffe zu werrn wie der Rest. Unn jetzt mei Idee: wenn du irchendwenn n schönne Rausch hossd, lässd du dir kurz vuurs Hemmgehn n Liter Blut obnehm unn hebsts dehemm in die Gfriertruhe auf. Wenn du dann of a Feier gessd unn zu spät künnst, weil du zum Beispiel Spätschicht hassd, dausd du dei Blut middn Alkohol auf unn lässds nei. Innerhalb vo a Minudde bist du so besoffe wie die annere unn konnsd mitgfeier. Gut, ne??? Schönner Nebeeffekt: für emol Geld hossd du zwee Räusch! Merr müssds eefoch amol ausprowier. Servus, der Eustach.