Neulich hobb ich mich jo scho mo drüü ausgelässe, däss irchendwenn (fast) alles automadisch funktioniert. Ower wie schnell doss vurwärts gedd, hob ich die boor Dooch gemerkt, wie ich amoll mein Buu sei Auto gebraucht hobb. Und er nedd dabei woor. Wenn du früher nei a frömms Auto gstieche bist, wor die enzich Frooch: „Wo iss der Rüggwärtsgang?“ Alles annere woor gloor. Schlössel erscht außen nei die Tür, dann inne neis  Zündschloss gsteggd, römm gedreht und scho iss die Kiste gelaffe. 4-Gang-H-Schaltung, Kubblung gedreede, 1. Gang links vurrn - unn los is gange! „Kubblung?“ werrn die junge Leut sooche. „Woss is denn doss?“ Ja, brauchts nixmerr. Die meiste Auto werrn scho bloß noch mit Automaadig oogeboode, weil alle zu faul zum Schalte senn! Und: Ölmessstab? Oogschafft. Mecht merr heut vo inne aus elegdronisch üüwers Menü. Abblendlicht-Hebel? Oogschafft. Der Fernlichtassistent merkt, wenn a Auto entgeeche künnt unn blennd oo. Drehknöpf? Oogschafft. Alles Dadsch! Wildschaden? Nedd oogschaffd, ower würds ball nixmerr gaawe. S Auto prüft mit Infrarotkamera, ob Wild vo rachts odder links künnt unn bremst im Notfall scho lang, bevuur s Reh, der Hoos odder die Wildsau off die Ströss iss. Wenn merr sei Fohrspur verlässt, weil merr vielleicht kurz eigeniggd iss, zobbelds Lenkrood unn wenn Energie gschboord weer söll, vibrierts Gaspedal unn mahnt so zum Langsamerfohrrn. Alles irchendwie a blöds Gfühl, wenn merr merkt, däss s Auto gscheiter iss wie merr sellwer unn zu sooche scheint: „Läss mich amoll mach, ich konns besser wie du.“ Unn dann gidds noch Zeuch, do könnst du veröggd geweer. „Smart Key“. Du leffst voss Auto wagg, der intelligent Schlössel schließt automadisch zu. Du künnst zurück, leffst offs Auto zu unn der Schlössel mecht auf. Musst du halt wöss!!! Ihr könnt euch nedd vuurgstell, wie ich gflucht hobb, wie ich – n „smart key“ in mei Kordhose – voss Auto wagggelaffe bin, dem Frieden ower nedd gedraud hobb unn noch amol prüf wollt, obs Auto aach wallich zu is. Zurügg gelaffe, worsch widder off. Logisch! Zehmoll langt nedd, däss ich wagg unn widder hie bin! Aach schöö oo moderne Auto: die Sprachsteuerung! „Kann ich noch etwas für Sie tun?“ hodds mich gfräächd. „Ja! S Wohnzimmer ghörd dabbeziert, die Kartoffel müsse raus unn der Gorrde ghörd gegroowe! Aff!!!“ Servus, der Eustach.