Neulich bin ich a Bundesströss entlang gfohrn unn hobb gsenn, wie a fleißiger Arbeiter n Strössgroowe unn die Böschung gemäht hodd. Er hat a glenns Kästle in die Händ unn der Mäher, der wie a glenne Raupe ausgsenn hodd, iss a boor Meter devo entfernt vo a ganz allee gfohrn unn hodd gemäht. Alles ganz eefoch. A boor Dooch vurhaar hat ich in die Zeitung gelassd, däss heut noch uugfahr 70 % vo die Ärwed vo Mensche unn scho 30 % vo Maschine gemocht werrn. Unn scho in siewe Johr, also 2025, sölle 50 % der Mensch unn die annere 50 % die Maschine mach. Unn wie lang würrds dauern, bis 80 % die Maschine unn bloß noch 20 % die Mensche mache. Der Arbeiter oo die Bundesströss iss dann aa scho lang überflüssig, die Maschine mechts no ganz allee. Scho heut fohrn die Mähdröscher unn die Bulldog per GPS unn brauche n ganze Dooch lang keen Bauer. Bus-, Taxi-, LKW-, U-Bahnfohrer: brauche mer scho ball nixmer. In Nürnberg föhrt die U-Bahn scho seit a boor Johr ohne Mensch. Baggerfohrer: senn aa ball überflüssig. So wie sämtliche Arbeiter, die Maschine of Baustelle fohrrn. „Ja, owwer die Maurer, die konn merr nedd ersetz!“ hodd der Gotthold gsocht. Nedd? In Australien gidds n Bauroboter, der a Haus in zwee Dooch a ganz allee mauert! Konn schließlich Dooch unn Nocht durchgemauer. Unn säuft debei kee enzichs Flöschle Bier! Dramatisch! Wie söll denn doss amoll alles wer? Wos mache die Leut, für die no kee Ärwed mehr do iss unn wie werrn die bezohlt? Unn wer gedd no üwerhaupt noch zum Schaffe, wenn 80% die Maschine mache? „Ich bin doch ned blöd!“ Unn woos mache die, die dehemm unn gut versurchd senn no n ganze Dooch? Grod heutzdooch, wo ee Wirrdschoffd nooch die anner zumecht? Frooche üüwer Frooche. Eene devo hobb ich mir sellwer gstellt: woss für a Ärwert bleid dann noch übrig, die a Maschine nie unn nimmer gemach würrd könne? Wie ich üüwerleecht hobb, wor ich grod offn Obtritt ghoggd, hobb gspült unn gemerkt, däss unner Klo verstopft iss. Unn wie!!! So orch, däss ich n Installateur ruff musst, der sich a ganze Stonn lang mit a Spirale unn aller annere möchliche Hilfsmittel römm gebloochd hodd, ömm mein Thron widder frei zu grieche. Unn in den Moment wor ich mir sicher: doss schaftt a Maschine nie! Also ihr junge Leut: gedd nei’s Handwerk. Doss hodd allemaladdich n „Goldene Boode“! Servus, der Eustach.