Wenn merr sidd, woss allerweil bei uns in Deutschland unn in ganz Europa los iss, fräächd mer sich, obs nedd gscheiter wär, alles, wallich alles, üüwern Haufe zu schmeiße unn ganz vo vurrn oozufange. Grenzen: weg! Regierungen: weg! Behörden: weg! Gesetze: weg! Anarchie aller Orten! Dääds dann vielleicht besser funktionier wie jetzt? Mir könnes jo mo vo Grund auf neu gedenk. Die Erde hodd a gsamte Oberfläche vo 510 Mio. Quadratkilometer (qkm). 360 Mio. devo senn Wasser, bleiwe 150 Mio. qkm Festland. Dovo wiederöm senn nerr bloß knapp 50 Mio. nutzbar, der Rest iss Eiswüste, normale Wüste, Steppe, Urwald usw. Off knapp 50 Mio. qkm Land könnte sich mir ca. 7,5 Mrd. Mensche also brääd gemach unn ausgedoob. Wenn mer scho ganz neu oofange, welle mer so gerecht wie möchlich gsei. Oon Dooch X gricht jeder vo uns 7,5 Mrd Mensche 6.400 qm Land. Jeder für sich. Voss glennst Baby bis zu die ältste Mensche. Müsst halt jeder seh, wie er allee of sei Grundstück gloor kommed. 6.400 Quadratmeter! Doss iss scho woss! Stell dir amol n Bauplatz in derre Gröss vuur. Nedd so schlecht! Ich hobbs ausgerechert: jeder annerer Mensch wär domit rein theoretisch im Umkreis 90 Meter entfernt. Aach Eheleut, die schon 30, 40 odder 50 Johr mitenanner verheiert senn. 90 Meter ausenanner! Doo wär Ruh! Reine Theorie halt. Denn: bis jetzt hömmer die ganz Weltbevölkerung nur so gleichmäßig wie nerr möglich verdääld. Ower dann gängs los. Mir müsste jo leb unn ess unn trink. Gschäffde wie Lidl, Aldi, Netto, Tegut unn Metzger, Bäcker usw. gäbs jo alles nedd. Ower natürlich Fauna unn Flora. Jeder griechert weeche mir a Jochdgewehr unn müssed seh, wie er zu woss zu Esse käm. Und scho gäng die Streiterei los. Garantiert! Nedd een Dooch dääds dauer! Off ee Grundstück gidds zum Beispiel a Wildsau, der Bewohner hodd Hunger offn guude Wildschweinbroode unn geht off die Pirsch. Die Sau künnt, er leecht oo, schießt owwer vorbei. Iss halt kee geübter Jäger. Sei Nochber owwer scho. Die Sau rennt off den sei Grundstück unn würd gschosse. Und scho hädde merr n erschte Krieg. „Du Sauhund! Hossd mei Sau gschosse!“ Und der anner: „No unn?! Woor doch of mei Grundstück!“ Und doss iss nur ee Beispiel. Mache mer also weiter wie bis jetzt unn browiern mer so guud wie möglich mitenanner auszukomme. Es bleit uns sowieso nix annersch übrig. Servus, der Eustach.