Jetzt biecht die Fußball-WM in Russland so langsam owwer sicher off ihr Zielgrade ei. Mir Deutsche senn jo scho lang raus, owwer merr guggt halt doch noch zu unn wunnert sich üüwer so monches, woss merr do sidd unn hört. Die moderne Ausdrügg! „Ballbesitzfußball“, „Arbeiten gegen den Ball“, „Forechecking“, „Pressing“  unn wääs der Deifel woos noch alles. Forchecking, off Deutsch „Angriffsverteidigung“, doss hömm mir domols aach scho gemocht. Nur hömm mir annersch dazu gsocht. „Hobb, amo drauf jetzt!!!“ hodd der Trainer neigschreit und dann senn mir drauf gange unn hömm „Forechecking“ gemocht, ohne däss mersch gemerkt hömm. „Pressing“ gab’s bei uns erscht nooch s Spiel. Ins Sportheim oder in die Wirtschoffd: fönnef Bier in a Stonn. Do hossd du ganz schö müss press! „Ballbesitzfußball“. Hatte mir domols aach scho und zwoor scho als Kinner. In die „Schüler“ odder die „Jugend“ wie F-, E-, D-, C-, B- unn A-Jugend früher ghässe hömm. In die Schülermannschoffd: Ellef Mann unn alles vo die erscht Minudde oo drauf offn Bool. Ballbesitzfußball halt! Ja, ja, alles würrd heut halt nur annersch benoomd, meend am End owwer s selb wie süsst. Woss mir bein Fußball aach noch auffällt, iss der geändert Sportgruß. Den gidds heut scho vuurs Spiel, wenn die voll däddowierde Mannschoffde oenanner verbeilaffe unn sich ooklatsche. Bei uns wor der Sportgruß noch nooch s Spiel und doss hodd nedd selten Größe verlangt. Vor allem, wenns rund gange iss unn du 0:6 verlurrn hassd. Alle zwee Mannschoffde hömm sich noochs Spiel oon Mittelkreis versammelt und der Schiedsrichter hodd feierlich s Ergebnis verkünnd. Rein theoretisch unn in Schriftdeutsch wie folgt: „Das Spiel Großeibstadt gegen Hollstadt endete 6:0 für Hollstadt. Auf die Sportkameradschaft ein dreifach kräftiges: Hipp hipp – Hurra! Hipp hipp – Hurra! Hipp hipp – Hurra!!!“ Theoretisch. Die Schiedsrichter worrn ower oft nedd die größte Redner, aach müd vom Pfeufe unn hömms daswaache roogeleiert: „Gröösenesucht geeche Hollschdt: 6:0 für Hollschdt. Off die Sportkameradschaft a dreifoch kräftichs „Wipp – Ja!“ „Wipp – Ja!“ „Wipp – Ja!!!“ Ville vo die alte Fußballer unn Zuschauer hömm doss hunnert mo ghört, wösse owwer bis heut nedd wos „Wipp – Ja!“ bedeut hodd. Wenn ich ehrlich bin: ich aa nedd. Wie der Sportgruß richtig ging, musst ich aach erschd noochles. Servus, der Eustach.